Ulaanbaatar
Б.Эрхэмбаяр ААШТ-ээс мөнгөн медаль хүртлээ
МОНГОЛЫН МЭДЭЭ | СПОРТ
Улаанбаатар, 2025 оны наймдугаар сарын 29 /МОНЦАМЭ/. Казахстаны Шымкет хотод буудлага спортын Ази тивийн аварга шалгаруулах тэмцээн 14 дэх өдрөө үргэлжилж байна.
16 дахь удаагийн тэмцээнд манай улсаас 30 тамирчин оролцож байгаа бөгөөд гурав дахь медалиа хүртэв. Өсвөрийн ангилалд эмэгтэй урт буучид багийн дүнгээр хүрэл медаль хүртсэн бол хоёр хоногийн өмнө олон улсын хэмжээний мастер Э.Даваахүү сонгомол гар бууны 50 метрийн дасгалд хүрэл медалиар энгэрээ мялаасан юм. Түүний хувьд 1987 оноос хойш 38 жилийн дараа гар бууны ангилалд тивийн аваргын медаль хүртсэн тамирчин боллоо. Өөрөөр хэлбэл, эрэгтэй гар буучид ААШТ-ээс хоёр дахь медалиа хүртсэн нь энэ.
Тэгвэл өчигдөр залуучуудын ангилалд урт бууны 50 метрийн дасгалд үндэсний шигшээ багийн тамирчин Б.Эрхэмбаяр 622.6 оноогоор мөнгөн медалийн эзэн болов. Тэрбээр тивийн аваргаас анхны медалиа авч байна. Түүнчлэн түүний үзүүлсэн энэнхүү амжилт нь Монголын урт бууны эрэгтэй тамирчдын хувьд анхдагч гэдгээрээ онцлогтой.
Ташрамд сонирхуулахад, Монголын буудлагын тамирчид 1974 оноос хойш өнөөдрийг хүртэл ААШТ-д тасралтгүй оролцож байна.
