Эмэгтэйчүүдийн ажиллах эрхийн конвенцын хэрэгжилтийг хөндөв
МОНГОЛЫН МЭДЭЭ | НИЙГЭМУлаанбаатар /МОНЦАМЭ/. Эмэгтэйчүүдийн хөдөлмөрлөх эрхийн судалгааг танилцуулах хэлэлцүүлэг өнөөдөр цахимаар боллоо.
Судалгаагаар Эмэгтэйчүүдийг алагчлах бүх хэлбэрийг устгах тухай НҮБ-ын Конвенцын хэрэгжилтийг хангахад бодлого тодорхойлогч нар хангалтгүй ойлголттой байгаагаас хэрэгжилтийн уялдаа холбоо, хариуцлага тооцох механизм сул гэсэн дүгнэлт гарчээ. Үүнийг өнөөдрийн “Эмэгтэйчүүдийн хөдөлмөрлөх эрх” хэлэлцүүлгээр хөндөн НҮБ-ын Конвенцын хэрэгжилтийг хангахад зайлшгүй шаардлагатай бодлого, үйл ажиллагааны зөвлөмж боловсруулсныг танилцууллаа.
Монголын эмэгтэйчүүдийн хөдөлмөрийг дэмжих холбоо бусад ТББ-уудтай хамтран Эмэгтэйчүүдийг алагчлах бүх хэлбэрийг устгах тухай НҮБ-ын Конвенцын хэрэгжилтийн талаарх тайлангийн “Эмэгтэйчүүдийн хөдөлмөрлөх эрх” дэд хэсгийг хариуцан ажилласан байна. Үүний хүрээнд сүүлийн 5 жил баримт бичгийн болон хөдөө орон нутаг, сум аймаг, нийслэлийн түвшинд чанарын судалгаа явуулж баримтжуулснаа мөн танилцуулав.
Хэлэлцүүлэгт УИХ-ын эмэгтэй гишүүдийн бүлэг, ХНХ-ын сайд А.Ариунзаяа болон холбогдох албан тушаалтан, ХХААХҮЯ, тус яамны ЖДҮ-ийн газар, хувийн хэвшил, иргэний нийгмийн байгууллагын төлөөлөгчид оролцлоо.
Цахим хэлэлцүүлгээр эмэгтэйчүүдийн хөдөлмөрлөх эрхийн зөрчил, тулгамдаж буй асуудал, олон улсын туршлагыг хөндөв.