Ulaanbaatar
ХАА-н чиглэлээр 50 жилийн хугацаанд 200 гаруй төсөл хөтөлбөр хэрэгжүүлжээ
МОНГОЛЫН МЭДЭЭ | ХУУЛЬ
Улаанбаатар /МОНЦАМЭ/. Монгол Улс НҮБ-ын Хүнс, хөдөө аж ахуйн байгууллагад гишүүнээр элссэний 50 жилийн ойн хүрээнд “Уур амьсгалын өөрчлөлт, цөлжилт, газрын доройтол хүнсний тогтолцооны тогтвортой байдалд үзүүлэх үр дагавар” сэдэвт олон талын уулзалт энэ сарын 24-нд Дундговь аймагт болов.
Гадаад харилцааны сайд Б.Батцэцэг уулзалтыг нээж хэлсэн үгэндээ "Монгол Улсын урт хугацааны хөгжлийн бодлого “Алсын хараа 2050”-д хөдөө аж ахуйг байгальд ээлтэй, уур амьсгалын өөрчлөлтөд дасан зохицсон, эрсдэл даах чадвартай, тогтвортой үйлдвэрлэлтэй эдийн засгийн тэргүүлэх салбар болгон хөгжүүлнэ" хэмээн заасныг дурдаад монгол хүний эрүүл, аюулгүй амьдрах орчныг бүрдүүлэхийн төлөө НҮБ-ын Хүнс, хөдөө аж ахуйн байгууллагатай үргэлжлүүлэн нягт хамтран ажиллах болохыг тэмдэглэв.
НҮБ-ын Хүнс, хөдөө аж ахуйн байгууллага нь өнгөрсөн 50 жилийн хугацаанд манай улсын хөдөө аж ахуйн үйлдвэрлэлийг нэмэгдүүлэх, хүнсний хангамж, аюулгүй байдлыг хангах чиглэлээр 200 гаруй төсөл, хөтөлбөр хэрэгжүүлсэн нь Монгол Улсын хүнс, хөдөө аж ахуй, хөнгөн үйлдвэрийн салбарын хөгжилд үнэтэй хувь нэмэр оруулсан юм.
