Ulaanbaatar
ЗАВХАН: Мал эмнэлгийн үйлчилгээний тарифыг нэг дахин нэмж баталлаа
ОРОН НУТГИЙН МЭДЭЭ | ЗАВХАН
Улиастай, 2025
оны дөрөвдүгээр сарын 1 /МОНЦАМЭ/. Завхан аймаг мал эмнэлгийн үйлчилгээний үнэ тарифыг шинэчлэн баталж
500-1000 төгрөг байхаар тогтоожээ.
Завхан аймагт орон нутгийн төсвөөс санхүүждэг мал эмнэлгийн ажил, үйлчилгээний үнэ тариф шинэчлэн тогтоох төслийн хэлэлцүүлгийг өнгөрсөн нэгдүгээр сараас хойш хоёр удаа зохион байгуулсан. Хэлэлцүүлэгт аймгийн 24 сумын иргэдээс санал авч дөрвөн сумын иргэд, малчид, мэргэжлийн байгууллагын төлөөлөл оролцож үнийг шинэчилж тогтоохоор санал нэгдсэн юм. Эдгээр хэлэлцүүлгүүдээс гарсан саналуудыг нэгтгэж аймгийн ИТХ-ын ээлжит 4-р хурлаар хэлэлцэж мал эмнэлгийн үйлчилгээний тарифыг шинэчлэн батлаад байна.
Мал амьтны эрүүл мэндийн тухай хуулийн 34 дүгээр зүйлийн 34.5-д “Орон нутгийн төсвийн хөрөнгөөр гүйцэтгэх мал эмнэлгийн үйлчилгээний зардлын нормативыг аймаг, нийслэлийн мал эмнэлгийн газрын саналыг үндэслэн аймаг, нийслэлийн ИТХ батална” гэж заасан.
Аймгийн ИТХ-аас шинэчлэн баталсан тарифаар, мал эмнэлгийн ажил үйлчилгээ буюу бод мал, гахай, нохойны тарилгын тарифыг 1000 төгрөг, бог малын тарилгын тарифыг 500 төгрөг байхаар шинэчлэн тогтоож,
баталлаа.
Хуучин мөрдөгдөж байсан тарифыг аймгийн ИТХ-ын тэргүүлэгчдийн 2017 оны 3 дугаар сарын 7-ны өдрийн 14 дүгээр тогтоолоор баталж байсан бөгөөд сүүлийн 8 жилийн хугацаанд шинэчлэн батлаагүй байна.
Бод малын арьсан
дор болон булчинд тарилга хийхэд хуучин мөрдөгдөж байсан үнэ нь толгой тутамд
450 төгрөг байсан. Бог
малынх хуучин мөрдөгдөж байсан үнэ нь толгой тутамд 250 төгрөг, гахай нохойны арьсан дор болон булчинд
тарилга хийхэд хуучин мөрдөгдөж байсан үнэ нь толгой тутамд 450 төгрөг байсан байна
гэж Завхан аймгийн ИТХ-ын ажлын
албанаас мэдээлэв.
