Ulaanbaatar
ЗАВХАН: Аймгийн хүн амын 43 хувь нь идэвхтэй дасгал хөдөлгөөнөөр хичээллэж байна
ОРОН НУТГИЙН МЭДЭЭ | ЗАВХАН
Улиастай, 2025
оны дөрөвдүгээр сарын 2 /МОНЦАМЭ/. Завхан аймагт эрүүл идэвхтэй амьдралыг
дэмжих, иргэдэд зөв дадлыг таниулах зорилтот үйл ажиллагаанд 20890 гаруй иргэн
оролцжээ.
Тус аймаг "Эрүүл монгол хүн" үндэсний хөдөлгөөнийг дэмжиж таван зорилтын хүрээнд 28 үйл ажиллагааг төлөвлөн зохион байгуулж байна.
Эдгээр үйл ажиллагаа нь нийгмийн эрүүл мэндийн тусламж үйлчилгээг сайжруулах, эрүүл мэндийн салбарын техник тоног төхөөрөмжийг нэмэгдүүлэх. Иргэд, олон нийтийн эрүүл мэндийн мэдлэг ойлголтыг дээшлүүлэх, тэднийг зөв дадалд уриалах. Төрийн болон аж ахуйн нэгж байгууллагуудын хамтын оролцоотой хүн амын нийгмийн эрүүл мэндийг сайжруулах зорилготой юм.
2020-2024 онд дээрх зорилтот үйл ажиллагаанд оролцогчдын тоо жил бүр нэмэгдсэн нь аймгийн хэмжээнд салбар дундын хамтын ажиллагааны үр дүн юм.
2023 онд гэхэд эрүүл хооллолт, идэвхтэй дасгал хөдөлгөөнөөр хичээллэгсдийн тоо сум бүрд харилцан адилгүй буюу 8700 гаруй иргэн байсан. Энэ оны нэгдүгээр улирлын байдлаар аймгийн 17 суманд идэвхтэй дасгал хөдөлгөөнөөр хичээллэдэг клубүүдэд 20800 гаруй иргэн байна. Идэвхтэй дасгал хөдөлгөөнөөр хичээллэдэг иргэдийн тоогоор Улиастай, Тосонцэнгэл, Цагаанхайрхан, Дөрвөлжин сум тэргүүлж байна. Сумдын эрүүл мэндийн төвүүдэд давхардсан тоогоор 9200 гаруй иргэн биеийн жингийн индексээ тодорхойлуулж зөвлөгөө авсан байна.
Аймгийн хэмжээнд хөдөлгөөн-эрүүл мэнд зорилтот үйл ажиллагаа үргэлжилж байна. Энэ зорилтын хүрээнд “Амка dance” бүжгийн клуб, “Цогт фитнес” бялдаржуулах төв, “Амар амьдрал” ТББ, “Ахмадын хороо”-той хамтран ажиллаж, халдварт бус өвчний эрсдэлт хүчин зүйлийг бууруулах зорилтот үйл ажиллагаануудыг явуулж байна.
Бүжгийн болон бялдаржуулах клубүүд,
төрийн бус байгууллагуудын хамтын оролцоотой олон нийтэд зориулсан бүжиг,
дасгал хөдөлгөөнийг зааж өгөх, эрүүл бие
бялдартай болох хүсэл эрмэлзэлтэй иргэдийн оролцоо ч сайн байна. Аймгийн
хэмжээнд давхардсан тоогоор 15 мянга орчим иргэн бүжгийн клубүүдээс сар бүр, 7
хоног бүр зохион байгуулдаг нийтийн үйл ажиллагаанд идэвхтэй оролцсон байна.
Сум бүрд явган аялал алхалт, идэвхтэй хөдөлгөөнийг хийж хэвшээд байгаа бөгөөд аймгийн хүн амын 43 хувь нь идэвхтэй хөдөлгөөнийг хийж хэвшээд байна. Цэцэрлэг, сургуулийн нийт суралцагчийн 85 хувь нь өдөр тутам дасгал хөдөлгөөн хийж байна. Төрийн болон төрийн бус байгууллагын хамтын ажиллагаа, оролцоо нэмэгдсэн нь идэвхтэй дасгал хөдөлгөөнийг дэмжих, хичээллэх иргэдийн тоог нэмж байгаа талаар аймгийн ЭМГ-аас мэдээлэв.
Улиастай сумын иргэд өглөө бүр идэвхтэй дасгал хөдөлгөөнөөр шинэ өдрийг эхлүүлж байна
