Ulaanbaatar
ДАРХАН-УУЛ: Төрийн албаны зөвлөлийн ажлын баг гурав хоног ажиллалаа
ОРОН НУТГИЙН МЭДЭЭ | ДАРХАН-УУЛ
Дархан /МОНЦАМЭ/. Төрийн албаны зөвлөлийн гишүүн Б.Идэрчулуунаар ахлуулсан ажлын баг Дархан-Уул аймагт гурав хоног ажиллалаа. Энэ хүрээнд аймгийн удирдлагуудтай уулзаж, Төрийн албаны хууль тогтоомж, төрийн албаны шинэтгэлийн бодлогын хэрэгжилттэй танилцах, тулгамдаж буй асуудлуудын талаар санал солилцсон аж.
Мөн төрийн албан хаагчийн ёс зүйн тухай хууль батлагдсантай холбоотой цаашид хэрэгжүүлэх арга хэмжээний талаар танилцуулга, сургалтыг нийт төрийн албан хаагчдыг хамруулан зохион байгууллаа.
Энэ сарын 18-21-ний өдрүүдэд ажиллах хугацаандаа Төрийн албаны “Хүний нөөцийн удирдлагын мэдээллийн тогтолцоо” цахим систем дэх мэдээллийн баяжилтыг тулгаж шалгах, хүний нөөцийн бодлого, үйл ажиллагаанд хяналт шалгалт хийх, мэргэшил арга зүйн зөвлөгөө өгөх, Монгол Улсын Засгийн газраас санаачлан хэрэгжүүлж буй авлигатай тэмцэх “Шүүр” ажиллагааны хүрээнд хийгдсэн ажлын тайлан, дүгнэлттэй танилцсан аж.
Мөн хяналт шалгалтын чиг үүргийн хүрээнд хүний нөөцийн бодлого, үйл ажиллагаанд хяналт шалгалт хийж төрийн жинхэнэ албан хаагчийг сонгон шалгаруулж, томилох үйл ажиллагааг хянасан аж. Шалгалтаар эрх бүхий байгууллага, албан тушаалтны шийдвэрээр батлагдсан бүтэц орон тооны дагуу ажиллаж байгаа эсэх, төрийн жинхэнэ албан хаагчийг сонгон шалгаруулсан (төрийн албаны ерөнхий болон тусгай шалгалт өгсөн) эсэх,
Төрийн жинхэнэ албаны удирдах, гүйцэтгэх албан тушаалын албан үүргийг түр орлон гүйцэтгүүлсэн шийдвэр хууль тогтоомжид нийцсэн эсэх, төрийн жинхэнэ албан хаагчийг өөр албан тушаалд шилжүүлсэн, сэлгэн ажиллуулсан шийдвэр хууль тогтоомжид нийцсэн эсэх, төрийн жинхэнэ албан хаагчийг албан тушаал бууруулж томилсон шийдвэр хууль тогтоомжид нийцсэн эсэх, Төрийн жинхэнэ албан хаагчийг албан тушаалаас халсан шийдвэр хууль тогтоомжид нийцсэн эсэх, хувийн ашиг сонирхлын урьдчилсан мэдүүлгийг гаргуулаагүй иргэнийг төрийн жинхэнэ албан тушаалд томилсон эсэх,
төрийн албаны тухай хууль болон албан
тушаалын тодорхойлолтод заасан төрийн жинхэнэ албан хаагчид тавигдах ерөнхий
болон тусгай шаардлагыг хангасан эсэх, төрийн жинхэнэ албан хаагчийн хувийн хэргийн
бүрдүүлэлтийг шалгах (төрийн жинхэнэ албан хаагчийн эрх зүйн байдлыг тогтоосон
баримт болох төрийн албаны ерөнхий болон тусгай шалгалт өгсөн баримт, Төрийн
албаны зөвлөл (салбар зөвлөлөөс)-өөс нэр дэвшүүлсэн шийдвэр, төрийн жинхэнэ
албан хаагчийн тангаргийн хуудас), төрийн албан хаагчийн сургалт, нийгмийн баталгааны хөтөлбөрийн
2023 оны хагас жилийн хэрэгжилтэд хяналт тавьж ажиллажээ.
