Улс орнуудын сайд, олон улсын байгууллагын удирдлагуудтай уулзаж байна

МОНГОЛЫН МЭДЭЭ | БАЙГАЛЬ ОРЧИН
oyundelger@montsame.gov.mn
2025-08-29 10:29:31

Улаанбаатар, 2025 оны наймдугаар сарын 29 /МОНЦАМЭ/. Байгаль орчин, уур амьсгалын өөрчлөлтийн сайд Б.Батбаатар Цөлжилттэй тэмцэх тухай НҮБ-ын конвенцын талуудын 17 дугаар бага хурлыг зохион байгуулах, бүс нутгийн хэмжээнд танилцуулах, Монгол Улсаас дэвшүүлж буй санал санаачилгад дэмжлэг авахаар улс орнуудын сайд, олон улсын байгууллагын удирдлагуудтай хоёр талт уулзалт хийж байна.


Тэрбээр Фижи Улсын Нади хотноо энэ сарын 26-29-нд болж буй НҮБ-ын Байгаль орчны ассамблейн 7 дугаар чуулганы бэлтгэл хангах зорилго бүхий Ази, Номхон далайн Байгаль орчны сайд нарын 6 дугаар форумд оролцож байгаа юм. Форумын үеэр бүсийн хэмжээнд үйл ажиллагаа явуулдаг иргэний нийгэм ТББ-уудын, хүүхэд залуусын, шинжлэх ухааны байгууллагуудын, Засгийн газар хоорондын ахлах албан тушаалтнуудын, Байгаль орчны сайд нарын уулзалт зохион байгуулж байгаа.


Ази, Номхон далайн бүсийн тогтвортой хөгжлийг цогцлоох шийдлийг байгаль орчны салбарт түшиглэн эрчимжүүлэх нь” сэдвээр болж буй сайд нарын форумд БОУАӨ-ийн сайд Б.Батбаатар дэлхийн байгаль орчны гурвалсан хямрал буюу уур амьсгалын өөрчлөлт, биологийн олон янз байдлын хомсдол, доройтлын үр нөлөөг багасгах, НҮБ-ын Байгаль орчны хөтөлбөрөөс дэвшүүлж буй “Хуванцар хаягдлыг багасгах” Засгийн газар хоорондын хэлэлцээрийн явцад санал зөвлөмж өгөх, Парисын хэлэлцээний хүрээнд шинэчлэн боловсруулж буй үйл ажиллагааны стратеги, үүн дотор агаар, орчны бохирдлыг чухалчлан хэлэлцэх хуралд байр сууриа илэрхийлж байгаа юм.


НҮБ-ын Байгаль орчны хөтөлбөрийн Ази номхон далайн бүсийн хариуцан ажилладаг 41 улсын төлөөлөл, тодруулбал 17 сайд, дэд сайдын түвшний удирдлага оролцож байна.


НҮБ-аас байгаль орчны асуудлуудыг тэргүүлэх чиглэл болгон Засгийн газар хоорондын уулзалтыг Ассамблей болгон өндөржүүлэх шийдвэр гаргаж анхны чуулганаа 2014 онд хийсэн бөгөөд Ерөнхийлөгчөөр нь Монгол Улс ажиллаж байлаа. 

関連ニュース