Өндөр Гэгээний “Азарган дөш” үзмэрийг 100 төгрөгөөр худалдан авч байжээ
МОНГОЛЫН МЭДЭЭ | СОЁЛ УРЛАГУлаанбаатар /МОНЦАМЭ/. Өндөр Гэгээн Занабазарын алтан шармал “Азарган дөш” хэмээх үзмэрийг Монголын Үндэсний музейн XVII-XХ зууны үеийн Монгол орон танхимд үзэгчдийн хүртээл болгон дэглэсэн байдаг. Энэхүү дөш нь ган бөгөөд дөрвөн тал болон хүрээ ирмэгийг алтан шармал хээ угалзаар чимэглэн урласан уран гоёмсог хийцтэй юм.
Өндөр гэгээн
Занабазарын “Азарган дөш” үзмэр:
Материал: алт шармал, ган
Хэмжээ: Өндөр 11 см, урт 16 см, өргөн 11 см, жин 8,650 гр
Холбогдох он цаг: XVII-XVIII зуун
Монгол оронд бурхны
шашин дэлгэрсэн хожуу дэлгэрэлтийн үе буюу XVII-ХХ зууны эхэн үед бурхны шашны
эд хэрэглэгдэхүүн бүтээх урлал дэлгэрэн хөгжжээ. Тухайлбал, хүрэл цутгуур,
баримал, сийлбэр, торгон зургийн төрлүүд юм. Тэдгээрээс хүрэл цутгуурын урлал
тэргүүлэх аястай хөгжсөн нь Өндөр гэгээн Занабазартай салшгүй холбоотой. Тэрбээр
уран баримал, цутгуурын урлагийн төрөлд өөрийн дэг суурийг бий болгон өвлүүлэн
үлдээсэн бөгөөд түүний гайхамшигт мутрын бүтээлүүд нь эдүгээ Монголын сүм хийд,
музей болон хувь цуглуулагч нарт уламжлагдан хадгалагдаж байна.
Ташрамд сонирхуулахад, Монголын Үндэсний түүхийн музей нь монгол нутагт хүн анх аж төрөх болсон хуучин
чулуун зэвсгийн үеэс эдүгээ хүртэлх нүүдэлчдийн түүх, соёл, өв дурсгал,
угсаатны зүй, уламжлалт зан заншлыг товчлон үзүүлсэн үзвэрийн 9 танхим бүхий
сан хөмрөгтөө 50000 гаруй үзмэртэй бөгөөд Монгол Улсын нийт музейн үзмэрийн 30 гаруй хувийг
хадгалж байдаг.