Улаанбаатар
Унгарт болсон Израил-Швейцарын тоглолт тэнцээгээр өндөрлөлөө
ДЭЛХИЙН МЭДЭЭ | СПОРТ
МОСКВА, 2023 оны арваннэгдүгээр сарын 16 /РИА Новости/. 2024 оны Европын аварга шалгаруулах тэмцээний /ЕАШТ/ урьдчилсан шатанд өрсөлдөж буй Швейцар-Израилын хөл бөмбөгийн шигшээ багуудын тоглолт тэнцээгээр өндөрлөлөө.
Унгарт болсон I хэсгийн уг тоглолтын 36 дахь минутанд Швейцарын
Рубен Варгас эхний гоолыг оруулсан бол 89 дэх минутанд Шон Вейсман тэнцээний
гоолыг хийжээ. Тоглолтын нэмэлт цагийн 5 дахь минутанд Швейцарын хагас
хамгаалагч Эдимилсон Фернандеш талбайгаас хөөгдсөн байна.
Энэ тоглолтыг онцлохын учир нь, Ойрхи Дорнодод зэвсэгт
мөргөлдөөн дэгдсэн энэ үед УЕФА-гийн ивээл дор болдог хөл бөмбөгийн тоглолтуудыг
Израилын нутаг дэвсгэрт зохион байгуулахгүй
гэсэн шийдвэрийг Европын хөл бөмбөгийн холбооны /УЕФА/ Гүйцэтгэх зөвлөл 10
дугаар сарын 19-ний өдөр гаргасан юм. Үүний дагуу Израилын шигшээ багийн талбайд болох байсан ЕАШТ-ний сонгон шалгаруулах шатны
хоёр тоглолтыг Унгарын Фельчут хот дахь Ф.Пушкашын нэрэмжит академийн цэнгэлдэх
хүрээлэнд явуулахаар шийдвэрлэжээ.
Израил ба Швейцарын шигшээ багууд нийтдээ 6 удаа учраа таарч
тоглосноос 5 удаа тэнцэж, нэг удаа швейцарчууд ялж байв.
Тэмцээний хүснэгтийг харвал, 8 тоглолтын дараах байдлаар
Швейцарын хөлбөмбөгчид 16 оноогоор хэсгээ тэргүүлж байгаа бол 12 оноотой Израилын
шигшээ баг гуравдугаарт жагсаж байна. Хоёрдугаарт 16 оноотой Румыны баг бичигджээ.
