Баян-Өлгий аймгийн удирдах албан тушаалтнууд хууль зөрчжээ

ОРОН НУТГИЙН МЭДЭЭ | БАЯН-ӨЛГИЙ
erdenechimeg@montsame.mn
2015-12-19 22:11:17

Авлигатай тэмцэх газрын ажлын хэсэг иргэнээс ирүүлсэн өргөдөл, гомдлын мөрөөр Баян-Өлгий аймгийн Өлгий, Цэнгэл суманд албан томилолтоор ажиллаж, авлига, ашиг сонирхлын зөрчлийн эсрэг хууль тогтоомжийн хэрэгжилтийн байдалд хяналт шалгалт явуулжээ.

Баян-Өлгий аймгийн Цэнгэл сумын гуравдугаар цэцэрлэгийн эрхлэгч А.Күмисханыг холбогдох хууль тогтоомж зөрчиж, ажлын байрны тодорхойлолтод тавигдах шаардлага, шалгуур үзүүлэлтийг хангаагүй байхад томилсон нь шалгалтаар тогтоогдсон тул түүнийг үүрэгт ажлаас нь чөлөөлсөн байна.

Мөн Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай хуулийг зөрчсөн Баян-Өлгий аймгийн Засаг даргын дэргэдэх Хүүхэд, гэр бүлийн хөгжлийн хэлтсийн дарга Х.Пернегүль, Ногооннуур сум дахь сум дундын эмнэлгийн ерөнхий эмч А.Мухтар нарт албан тушаалын цалинг бууруулах сахилгын шийтгэл ногдуулжээ.

Улмаар Баян-Өлгий аймгийн удирдлагуудад авлига, ашиг сонирхлын зөрчлөөс урьдчилан сэргийлж, Авлигын эсрэг хууль, Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай хуулийг хэрэгжүүлэн ажиллах үүрэг, чиглэл өгчээ.

Ш.Айзаря

Related news