Ulaanbaatar
Монгол Улс 2037 он хүртэл Оюутолгойгоос ашиг хүртэхгүй гэв
МОНГОЛЫН МЭДЭЭ
УИХ дахь Бие даагчдын зөвлөл өнөөдөр нэр бүхий 6 гишүүнээс Оюутолгойн далд уурхайн бүтээн байгуулалтын гэрээний талаар Ерөнхий сайдад тавьсан асуулгын хариуны талаар мэдээлэл хийлээ.
Ерөнхий сайд Оюутолгойн далд уурхайн бүтээн байгуулалтын гэрээ буюу “Дубайн гэрээний талаар тавьсан асуулгын хариуг өнгөрсөн баасан гарагт өгсөн. 2009 оны анхны гэрээгээр Монгол Улс 2023 оноос цэвэр ашиг хүртэх байсан. Гэвч Дубайн гэрээгээр далд уурхайн бүтээн байгуулалтад 6 тэрбум ам.долларын санхүүжилт авснаар үүдэн цэвэр ашиг хүртэх хугацаа 2037 он хүртэл хойшилсон байна хэмээн УИХ-ын гишүүн Х.Болорчулуун мэдээллийнхээ эхэнд онцлон тэмгдэлэв.
Тэрбээр, Оюутолгойн асуудал ийм хүнд нөхцөлд хүрээд байхад “Шударга ёс” эвслийн бүлэг яагаад эсэргүүцэхгүй байна вэ. Хаврын чуулган хаах үед МАН-ын бүлгээс Дубайн гэрээний талаар дүгнэлт гаргаж байгаа. Удахгүй мэдээлнэ гэж байсан ч өнөөг хүртэл мэдээлэхгүй байна. Ерөнхий сайд Оюутолгойг битгий улс төржүүл гэсэн. Дэлхийд 2 дугаарт орох, Монгол Улсыг олон жил тэжээх томоохон ордоос ашиг хүртэж чадахгүйд хүрч байхад бид үгээ хэлэх ёстой” гэлээ.
Мөн УИХ-ын гишүүн С.Ганбаатар “Монгол Улс 21 тэрбум долларын өрөнд орж, цалин тэтгэврээ нэмэх бус хасах тухай ярьж байна. Монгол Улс Оюу толгойгоос таван хувийн роялти авч байгаа хэдий ч гурван хувьтай тэнцэх хэмжээний мөнгийг менежментийн зардал нэрийдлээр буцаан өгдөг. Тэгэхээр Монгол Улс ямар ч хувь, хишиг хүртэхгүй байна гэсэн үг. Одоо энэ байдал 2037 он хүртэл үргэлжлэх боллоо.
Чуулганаар 2015 оны төсвийн тодотгол, 2016 оны төсвийг хэлэлцэж байна. Цалин хасч, агентлагуудыг татан буулгаад хоёр тэрбум доллар хэмнэж байгаа. Яамд дээр аливаа барилга байгууламжийн тусгай зөвшөөрөл олгож, тендер зарладаг байсныг болиулж, авлигал, хүнд суртлыг арилгах зорилгоор Худалдан авах ажиллагааны газрыг байгуулсан. Гэвч 2016 оны төсөвт энэхүү байгууллагыг татан буулгахаар тусгажээ. Энэ бол гол зорилтоосоо ухарч байгаа үйлдэл гэж үзэж байна. Тиймээс энэ байгууллагыг татан буулгах талаар дахин бодож үзэхийг Сангийн сайд Б.Болороос хүссэн” гэлээ.
Ч.Ариунболд
