Ulaanbaatar
Коронавирусний тархалтын түвшинг тогтоох түр журам батална
МОНГОЛЫН МЭДЭЭ | УЛС ТӨР
Улаанбаатар /МОНЦАМЭ/. Коронавирусний халдвараас сэргийлэх ажлыг зохион байгуулах болон тархалтын түвшинг тогтоох түр журам боловсруулах, хэрэгжүүлэх ажлын багаас ДЭМБ-ын зөвлөмжийн хүрээнд олон улсын жишигт нийцүүлэн үйлдвэрлэл, үйлчилгээ зэрэгтэй холбоотой нийтлэг асуудлыг зохицуулах журам боловсруулжээ.
Түр журмыг баталснаар халдварын түвшин, зэрэглэлийг тогтоох, үүнтэй уялдуулж бусад ажлыг хэрэгжүүлэх эрх зүйн үндэс бүрдэнэ гэдгийг ажлын багийн ахлагч, Батлан хамгаалахын сайд Г.Сайханбаяр тус журмыг Шадар сайдад танилцуулахдаа хэлэв.
Журмыг баталснаар Улсын хэмжээнд иргэн, аж ахуйн нэгж, байгууллагын ажил, амьдрал хэвийн үргэлжлэх, орлого нь нэмэгдэх, төр, засаг, төрийн албан хаагчид нэгдмэл нэг ойлголттой ажиллах, нийгэм, эдийн зсгийн тогтвортой байдал бий болох зэрэг давуу талтай гэж Монгол Улсын Шадар сайд С.Амарсайхан үзэж буйгаа хэллээ. Тэрбээр иргэн, аж ахуйн нэгжүүдийн дагаж мөрдөх түр журмын төслийг дахин тодотгохыг Шадар сайдын Ажлын албанд үүрэг болгов. Мөн зах, бөөний худалдааны төв, автобусны буудал зэрэг олон нийтийн газарт ариутгал, халдваргүйжүүлэлтийн төхөөрөмж суурилуулахыг даалгалаа. Түр журмыг Засгийн газрын хуралдаанаар батлуулж энэ сарын 23-наас дагаж мөрдөхөөр төлөвлөж байна гэж Шадар сайдын Ажлын албанаас мэдээллээ.
