Ulaanbaatar
Эм, эмнэлгийн хэрэглэгдэхүүний тухай хуулийн төслийн хэлэлцүүлэг болов
ОРОН НУТГИЙН МЭДЭЭ | АРХАНГАЙ
Архангай /МОНЦАМЭ/. УИХ-ын гишүүн Ж.Чинбүрэнгээр ахлуулсан ажлын баг “Эм эмнэлгийн хэрэглэгдэхүүний тухай” хуулийн төслийн хэлэлцүүлгийг Архангай аймагт зохион байгууллаа.
Энэхүү хуулийн төсөлд эм, эмнэлгийн хэрэглэгдэхүүний чанар, аюулгүй байдлыг хангах зорилгоор эмнэлгийн тусламж үйлчилгээнд хэрэглэх хэрэгслийг эрсдэлээр ангилан бүртгэх шинэ зохицуулалт оруулжээ.
Мөн эм, уламжлалт эм, малын эмийг сонгох, бүртгэх зарчим, шалгуур болон эм үйлдвэрлэгч, импортлогчийн эмийн чанар, аюулгүй байдалд хүлээх хариуцлагыг нэмэгдүүлж, эмийн хяналтад нэгдсэн цахим программ хангамж нэвтрүүлэхээр тусгаад байна.
Эмийн хангамж, хүртээмж, иргэдийн эм худалдан авах боломжийг нэмэгдүүлэхээр үнийн ил тод байдлыг хангах, гадаад дотоодын жишиг үнийг нэвтрүүлэх, түгээлтийн шат бүрт үнийг зохицуулах, иргэд шуудан илгээмжээр эмийг хүлээн авах эрх зүйн орчныг шинэчлэх зэрэг заалтуудыг хэлэлцсэн байна.
Хэлэлцүүлэгт УИХ-ын гишүүн Ё.Баатарбилэг, УИХ-ын Тамгын газар, ЭМЯ, Эм эмнэлгийн хэрэгслийн хяналт, зохицуулалтын газар, Азийн хөгжлийн банкны төслийн нэгжийн төлөөлөл, аймгийн удирдлагууд, ЭМГ, эрүүл мэндийн салбарын төлөөллүүд оролцжээ.
