Ulaanbaatar
Дани, Францын компаниуд Улаан тэнгист тээврээ үргэлжлүүлнэ
ДЭЛХИЙН МЭДЭЭ | ЭДИЙН ЗАСАГ
КОПЕНХАГЕН, 2023 оны
арванхоёрдугаар сарын 29 /Reuters/. Дани, Францын томоохон тээврийн
компаниуд Улаан тэнгисээр хийх
тээврээ хэсэгчлэн сэргээж байгаагаа зарлалаа.
Ираны дэмжлэгтэй хутичууд
хөлөг онгоцууд руу дайрах вий
гэсэн болгоомжлолын улмаас олон улсын тээврийн компаниуд тус тэнгисээр дамжин өнгөрөх тээврийг түр зогсоогоод байгаа юм.
Харин Данийн
A.P. Moller-Maersk компани лхагва
гарагт өөрийн чингэлэг тээврийн
хөлөг онгоцны хамгийн сүүлийн үеийн хуваарийг
танилцуулсан бөгөөд үүнд
зарим хөлөг онгоц Улаан тэнгис, Суэцийн суваг зэрэг маршрутаар тээвэр хийхийг харуулсан байжээ.
АНУ тэргүүтэй улс
орнууд Улаан тэнгист хөлөг онгоцуудыг хамгаалах ажиллагаа явуулж байгаа
нь тээвэрлэлтийг сэргээх шийдвэр
гаргахад нөлөөлсөн гэж тус компани мэдэгдсэн юм. АНУ-ын
Батлан хамгаалахын сайд Ллойд Остин арилжааны тээвэрлэлтийг хамгаалах үндэстэн
дамнасан санаачилгыг өнгөрсөн долоо
хоногийн эхээр танилцуулсан билээ.
Түүнчлэн Францын
CMA CGM компани мөн зарим
хөлөг онгоц нь Улаан
тэнгисээр дамжин өнгөрсөн талаар мягмар
гарагт мэдэгджээ. Харин Британийн
томоохон нефтийн компани BP, Швейцарын тээврийн MSC, Тайванийн Evergreen
Marine зэрэг бусад компаниуд
хөлөг онгоцуудынхаа чиглэлийг өөрчилсөн хэвээр байна.
