Зураач Б.Баярцэнгэлд Английн хоёр галерей хамтран ажиллах санал тавьжээ
МОНГОЛЫН МЭДЭЭ | СОЁЛ УРЛАГУлаанбаатар /МОНЦАМЭ/. ИБУИНВУ-ын Лондон хотноо энэ сарын 16-17-нд болсон “Parallax Art Fair 2019” олон улсын үзэсгэлэнд зураач, сийлбэрч М.Ариунбаяр, зураач Б.Баярцэнгэл нар оролцож, Монголын нүүдэлчин ахуйг илэрхийлсэн уран бүтээлийн дээжээ олонд танилцуулав.
Монголын Урчуудын эвлэлийн гишүүн, зураач Б.Баярцэнгэл ОХУ, БНХАУ, БНСУ-д үзэсгэлэнгээ дэлгэж байсан чадварлаг уран бүтээлж юм. “Parallax Art Fair”-д оролцох үед түүнийг Английн хоёр галерей хамтран ажиллах санал тавьсан байна.
Төрийн хан хуур, Улаанбаатар хотын хуурийг загварыг бүтээхэд оролцож байсан чадварлаг уран бүтээлч, зураач, сийлбэрч М.Ариунбаяр 2018 онд ИБУИНВУ-д суугаа Элчин сайдын яам, Кэмбриджийн их сургуульд 11 сийлбэрээс бүрдсэн “Mongols” үзэсгэлэнгээ дэлгэж байв.
Энэхүү үзэсгэлэнд дэлхийн 300 орчим уран бүтээлч оролцож, 7000 гаруй бүтээлээ олны хүртээл болгосон бөгөөд 16 мянга гаруй хүн үзэж сонирхжээ. “Parallax Art Fair-2018” олон улсын үзэсгэлэнд Британид ажиллаж амьдарч буй Монгол зураачид болох Т.Отгонбаяр, С.Алтанцоож, Х.Элбэгзаяа нар оролцож, Монголын урлаг соёлыг дэлхий нийтэд сурталчилж байсан юм.