Улаанбаатар
Цагдаагийнхан гар бөмбөгийн аваргаа тодруулав
МОНГОЛЫН МЭДЭЭ | ХУУЛЬЦагдаагийн байгууллагын 95, Улаанбаатар хотын цагдаагийн газрын 90 жилийн ойг угтаж цагдаагийн байгууллагын аварга шалгаруулах “Монгол цагдаа-95” гар бөмбөгийн тэмцээнийг амжилттай зохион байгууллаа.
Тэмцээнд төв, орон нутгийн цагдаагийн газар, хэлтсийн 38 багийн 500 гаруй тамирчид хурд хүч, авхаалж самбаагаа сорин өрсөлдсөн юм. Энэ удаагийн тэмцээнд Өмнөговь, Баянхонгор, Говь-Алтай, Ховд зэрэг найман аймгийн 60 шахам тамирчид оролцлоо. Эрэгтэй баг тамирчдаас Хэнтий аймгийн цагдаагийн газрын баг тамирчид тэргүүлсэн бол Улаанбаатар хотын цагдаагийн газар, Ховд аймгийн цагдаагийн газрын багууд удааллаа. Эмэгтэй баг тамирчдаас тэргүүн байрт Чингэлтэй дүүрэг дэх цагдаагийн нэгдүгээр хэлтэс шалгарч, Баянгол дүүрэг дэх цагдаагийн нэгдүгээр хэлтэс, Цагдаагийн ерөнхий газрын Автобаазын баг тамирчид шалгарч алт, мөнгө, хүрэл медалийн эзэд боллоо. Шилдэг эрэгтэй тэгш тоглогчоор Улаанбаатар хотын цагдаагийн газрын ажилтан, цагдаагийн ахлах ахлагч Д.Мөнх-Эрдэнэ, эмэгтэй тэгш тоглогчоор Баянгол дүүрэг дэх цагдаагийн нэгдүгээр хэлтсийн ажилтан, цагдаагийн ахлах ахлагч Д.Уянга нар шалгарчээ.
Ж.Батсайхан
