Улаанбаатар
УИХ-ын Хүний эрхийн дэд хорооны бүрэлдэхүүнд Н.Алтанхуягийг нэмлээ
МОНГОЛЫН МЭДЭЭ | УЛС ТӨР
Улаанбаатар /МОНЦАМЭ/. УИХ-ын чуулганы өнөөдрийн хуралдаанаар, “Хүний эрхийн дэд хорооны бүрэлдэхүүнд өөрчлөлт оруулах тухай” тогтоолын төслийг батлав.
УИХ-ын тухай хуулийн 8 дугаар зүйлийн 8.1.6-д “УИХ-ын гишүүн нь Байнгын, дэд, түр хорооны бүрэлдэхүүнд орох, түүнээс гарах эрхтэй”, УИХ-ын чуулганы хуралдааны дэгийн тухай хуулийн 26 дугаар зүйлийн 26.3-т “Дэд хорооны бүрэлдэхүүний тухай асуудлыг харьяалах Байнгын хорооны хуралдаанаар урьдчилан хэлэлцэх бөгөөд нэгдсэн хуралдаан Байнгын хорооны гаргасан санал, дүгнэлтийг үндэслэн дэд хорооны бүрэлдэхүүний тухай тогтоол батална.” гэж тус тус заасан. Үүний дагуу УИХ-ын гишүүн Н.Алтанхуяг Хүний эрхийн дэд хорооны бүрэлдэхүүнд орох хүсэлтээ ирүүлжээ. Иймд УИХ-ын гишүүн Н.Алтанхуягийг Хүний эрхийн дэд хорооны бүрэлдэхүүнд нэмэхээр тогтоолын төслийг боловсруулжээ.
УИХ-ын Хууль зүйн байнгын хорооны энэ сарын 1-ний хуралдаанаар эл төслийг хэлэлцэж дэмжсэн талаарх санал дүгнэлтийг УИХ-ын гишүүн Ц.Мөнхцэцэг танилцуулав.
Байнгын хорооны санал, дүгнэлттэй холбогдуулан асуулт асуух гишүүн байгаагүй тул санал хураав. Хуралдаанд оролцсон гишүүдийн олонх тогтоолын төслийг батлахыг дэмжсэнээр чуулганы өнөөдрийн нэгдсэн хуралдаан өндөрлөв.
