Улаанбаатар
Орон нутгийн хэвлэлийн ажилтнуудад халдвар хамгааллын хэрэгслийг илгээжээ
ОРОН НУТГИЙН МЭДЭЭ | СҮХБААТАР
Сүхбаатар /МОНЦАМЭ/. Сүхбаатар аймгийн сэтгүүлчдийн “Талын түрлэг” ТББ-аас
орон нутгийнхаа хэвлэл мэдээллийн салбарын ажилтнуудад халдвар хамгааллын хэрэгсэл илгээжээ.
Аюулт цар тахлын энэ
цаг үед өвчний голомтод тусгай хүчнийхэн, эрүүл мэндийн салбар, төрийн байгууллагынхантай
мөр зэрэгцэн ажиллаж буй хэвлэл мэдээллийн ажилтнууддаа тэд өөрсдөө хандив
цуглуулан нийт 600 гаруй мянган төгрөгийн хамгаалах хэрэгслийг илгээжээ. Уг илгээмжид амны хаалт, гар ариутгагч, нэг
удаагийн бээлий, микрофоны хамгаалалт, дархлаа дэмжих витамин багтсан байна. МСНЭ-ийн
Сүхбаатар аймаг дахь салбарын зүгээс илгээмжийг байгууллагууд болон ажилчид,
мөн ахмадууддаа хуваарилан өгсөн юм.
Одоогоор Сүхбаатар
аймагт нэг телевиз, нэг сайт, нэг сонин албан ёсоор үйл ажиллагаагаа явуулж
байгаа. Эдгээр байгууллага болоод Үндэсний мэдээллийн МОНЦАМЭ агентлаг, МҮОНРТ-ийн
сурвалжлагч, төрийн албанд хэвлэл мэдээллийнхээ чиглэлээр ажиллаж байгаа гээд
нийт арваад хүн цар тахлын үеэр тогтмол ажиллаж, орон нутгийнхаа иргэдэд
мэдээ мэдээллийг цаг алдалгүй хүргэсээр байгаа билээ.
Сүхбаатар нутгийн
гаралтай сэтгүүлч, зохиолчдын нэгдсэн “Талын түрлэг” ТББ нь 2013 онд байгуулагдсан бөгөөд
тэр цагаас хойш өнөөг хүртэл уран бүтээлчдээ дэмжих, хамтран ажиллах, туршлага
солилцох, бие биенээсээ суралцах чиглэлээр тогтмол үйл ажиллагаа явуулж буй юм.
