НЬЮ-ЙОРК, 2025 оны дөрөвдүгээр сарын 2 /Forbes/. Сүүлийн нэг жилийн хугацаанд Орост ам.долларын тэрбумтнуудын тоо нэмэгдэж, тэдний нийт хөрөнгийн хэмжээ өссөн тухай Америкийн "Forbes" сэтгүүлд өчигдөр нийтлэгдсэн тэрбумтнуудын шинэчилсэн жагсаалтад дурджээ.

Долларын тэрбумтнуудын тоогоор ОХУ тавдугаарт бичигдэж байна

Нийтдээ эл жагсаалтад 3028 хүн багтжээ. Долларын тэрбумтнуудын тоогоор АНУ (902), Хятад (516), Энэтхэг (205), Герман (171) улсууд тэргүүлсэн бол ОХУ тавдугаарт бичигдсэн байна.

Англи хэлээр гардаг Forbes сэтгүүлийн цахим хуудсанд мэдээлснээр, ОХУ-д ам.долларын тэрбумтнуудын тоо нэг жилийн дотор  120-оос 140 болж нэмэгдсэн бол тэдний нийт хөрөнгийн хэмжээ 537 тэрбум ам.доллароос 580 тэрбум болж өсжээ.  Харин тус сэтгүүлийн орос хэлээрх хувилбарт 2025 онд ОХУ-д ам.долларын тэрбумтнуудын тоо 146 болж, тэдний нийт хөрөнгө 625.5 тэрбум ам.долларт хүрсэн гэж бичжээ. Оросын хамгийн баян 20 хүний 14 нь барууны ямар нэгэн хориг арга хэмжээнд өртөж буйг мөн дурдсан байна. 

“Forbes Russia” сэтгүүлд бичсэнээр, тэрбумтнуудын жагсаалтад багтсан оросуудын тоо болон тэдний нийт хөрөнгө 2022 онд Украинд дайн эхэлсний дараа огцом буурснаас хойш эргэн өссөөр 2021 онд бүртгэгдсэн өмнөх дээд үзүүлэлтийг давжээ. Тэрбумнуудын жагсаалтыг “Forbes” сэтгүүл 1987 оноос хойш гаргаж байгаа юм.

Forbes-ийн шалгаруулсан Оросын хамгийн баян хүмүүс

“Лукойл" компанийг үүсгэн байгуулагч, 28.7 тэрбум ам.доллароор хэмжигдэх хөрөнгөтэй Вагит Алекперов хоёр дахь жилдээ Оросын хамгийн баян хүнээр тодорсон бол түүний араас “Северсталь”, “Новатек” компанийн тэргүүн Алексей Мордашов (28.6 тэрбум), Леонид Михельсон (28.4 тэрбум) нар гэр бүлийн хамт бичигджээ.

"Forbes"-ийн мэдээлснээр, Оросын иргэншилтэй тэрбумтнуудын ихэнх нь өөр улсуудад амьдарч байна. Тухайлбал, Андрей Мельниченко АНЭУ-д, Михаил Прохоров Швейцарт, Петр Авен Латви улсад, Елена Батурина Их Британид амьдарч байгаа ажээ.

Хуучин ЗХУ-ын бүрэлдэхүүнд байсан орнуудын тэрбумтнууд

"Forbes" сэтгүүлээс танилцуулсан энэ оны тэрбумтнуудын жагсаалтад Украины долоон иргэн багтсан байна. Тэдний хамгийн баян нь 7.9 тэрбум ам.долларын хөрөнгөтэй Ринат Ахметов юм. Жагсаалтад мөн Казахстаны зургаан иргэн багтсан бөгөөд тус улсын хамгийн баян хүнээр Вячеслав Ким (7.1 тэрбум) тодорчээ.

Гүржийн хамгийн баян хүнээр Казахстаны “Kaspi” банкны ерөнхийлөгч Михаил Ломтадзе (5.9 тэрбум) тодорсон бол Бизина Иванишвили Гүржийн тэрбумтнуудын жагсаалтын хоёрдугаар эрэмблэгджээ. Тэрбээр болон түүний гэр бүл 2.7 тэрбум ам.доллароор үнэлэгдэх хөрөнгөтэй аж.

Армени улсын цорын ганц ам.долларын тэрбумтан бол Рубен Варданян (1.2 тэрбум) бөгөөд тэрбээр Уулын Карабах дахь салан тусгаарлагчдыг толгойлсон гэх хэргээр Баку хотын шоронд хоригдож байгаа юм. 

Балтийн тэнгисийн орнуудаас зөвхөн Эстони улс л ам.долларын тэрбумтантай бөгөөд эдгээр хүмүүс бол Кристо Кяарманн (2.3 тэрбум), Таавет Хинрикус (1.2 тэрбум) нар юм.