Улаанбаатар
Домогт Кармело Энтони алдрын танхимд нэрээ мөнхөлнө
ДЭЛХИЙН МЭДЭЭ | СПОРТ
ВАШИНГТОН, 2025 оны дөрөвдүгээр сарын 3 /ESPN/. Олимпын гурван удаагийн аварга, Америкийн сагсан бөмбөгчин Кармело Энтонигийн нэрийг энэ онд Сагсан бөмбөгийн алдрын танхимд мөнхлөхөөр шийдвэрлэсэн тухай ESPN сувгийн сэтгүүлч Шэмс Чарания Х нийгмийн сүлжээнд мэдээлжээ.
Өдгөө 40 настай К.Энтони Үндэсний сагсан бөмбөгийн холбоонд (NBA) тоглох хугацаандаа “Денвер”, “Нью-Йорк”, “Оклахома”, “Хьюстон”, “Портланд”, “Лос-Анжелес Лэйкерс” багуудад хүчин зүтгэж байсан юм. Тэрбээр NBA-гийн Бүх оддын тоглолтод 10 удаа оролцож байсан бөгөөд 2008, 2012, 2016 онуудад АНУ-ын шигшээ багийн бүрэлдэхүүнд Олимпын алтан медаль, 2004 онд хүрэл медаль хүртэж байв.
Нейсмитийн нэрэмжит алдрын танхимыг 1959 онд байгуулж, 1968 онд олон нийтэд нээжээ. Энэхүү танхимд сагсан бөмбөгийн хөгжилд хувь нэмрээ оруулсан тоглогчид, дасгалжуулагчид, шүүгчид, албаны хүмүүс, сэтгүүлчид, тайлбарлагчдын нэрсийг мөнхөлдөг. Сагсан бөмбөгийн спортыг үндэслэгч Жеймс Нейсмитийн нэрээр нэрлэсэн энэхүү танхим АНУ-ын Массачусетс муж улсын Спрингфилд хотод байдаг.
