Улаанбаатар
30 гаруй малчин өрх өөр аймгийн нутагт оторлож байна
ОРОН НУТГИЙН МЭДЭЭ | ӨМНӨГОВЬ
Өмнөговь аймагт уулархаг нутгаараа бага зэргийн цастай налгар өвөл болж байна.
Тус аймгийн бэлчээрийн 40 орчим хувь нь сайн, 45 хувь нь дунд, 15 хувь нь тааруу байгаа гэж ХХААГ-аас мэдээлж байгаа юм. Дунд зэрэг бөгөөд тааруу бэлчээрийн гарцтэй нутгийн зарим малчид өөрийн болон бусад аймгийн сумдад отроор өвөлжиж байна.
Тухайлбал бусад 4 аймгийн 7 суманд 31 малчин өрхийн 13649 мал отроор өвөлжиж байгаа ажээ. Энэхүү өрхүүдэд 104 хүн байгаа бөгөөд 0-1 насны нэг, 1-5 насны 14 хүүхэд, өндөр настан нэг, хөгжлийн бэрхшээлтэй иргэн хоёр байгаа юм байна.
Мөн 9 сумын 134 өрхийн 60 гаруй мянган мал өөрийн аймгийн бусад сумдад өвөлжиж байна. Энэхүү өрхүүдэд 411 хүн байгаа бөгөөд 0-1 насны 5, 1-5 насны 39 хүүхэд, өндөр настан 20, хөгжлийн бэрхшээлтэй иргэн 5 байна гэж аймгийн ХХААГ-аас мэдээллээ.
Д.Мишигсүрэн
