Ulaanbaatar
В.Путин Армений Ерөнхий сайд болон БНХАУ-ын даргатай уулзжээ
ДЭЛХИЙН МЭДЭЭ | УЛС ТӨР
ТЯНЬЖИН, 2025 оны наймдугаар сарын 31. /ТАСС/. Шанхайн хамтын ажиллагааны байгууллагын /ШХАБ/ дээд хэмжээний уулзалтад оролцож буй ОХУ-ын Ерөнхийлөгч В.Путин БНХАУ-ын дарга Ши Жиньпинтэй уулзах үеэрээ Аляскт болсон Орос-Америкийн хэлэлцээний үр дүнг хэлэлцсэн байна. Энэ тухай Ерөнхийлөгчийн туслах Ю.Ушаков мэдэгдлээ.
"Манай төрийн тэргүүн БНХАУ-ын даргатай хамт суугаад маш идэвхтэй бөгөөд үр дүнтэй ярилцсан. Ерөнхийлөгчийн өөрийнх нь надад хэлснээр, манай талаас америкчуудтай тогтоосон хэлхээ холбооны тухайд тэд ярилцсан” гэж тэрбээр хэлэв.
Ерөнхийлөгч В.Путин Хятад улсад дөрвөн хоног айлчлах хугацаандаа олон улс орны төр засгийн тэргүүн нартай хоёр талын уулзалтууд хийхээр төлөвлөсөн бөгөөд энэ талаар тухай бүрт нь мэдээлэл өгнө гэдгийг ОХУ-ын Ерөнхийлөгчийн хэвлэлийн нарийн бичгийн дарга Д.Песков хэллээ. Ерөнхийлөгч В.Путин өнөөдөр орой болсон хүндэтгэлийн зоогийн дараа хамгийн түрүүнд Арменийн Ерөнхий сайд Н.Пашинянтай уулзжээ.
Ю.Ушаковын сэтгүүлчдэд
танилцуулсан хуваарьт энэ уулзалт тусгагдаагүй байсан бөгөөд тэрбээр дараа нь
хэлэхдээ “ажлын хуваарь чанд хатуу биш, ямар ч үед янз бүрийн форматаар явагдах шинэ шинэ
уулзалтуудыг нэмж оруулж магадгүй” гэдгийг дурдсан байна.
