Хууль бусаар алт олборлож эхэлснийг мэдээлэв

МОНГОЛЫН МЭДЭЭ | ХУУЛЬ
batsaikhan@montsame.mn
2016-01-19 14:28:34

Төв аймгийн Заамар сумын Улаан Шивэртийн аманд олборлолт явуулдаг “Авдарбаян” компаниас өөрийнх нь эзэмшлийн талбайд хууль бусаар үйл ажиллагаа явуулж буй хэргийн талаар мэдээллээ.

 2012 онд “Авдарбаян” компанийн эзэмшлийн 55 гектар талбайг Урт нэртэй хуулиар ашигт малтмал ашиглахыг хориглосон талбайтай давхцаж байна гэж үзэн эрхийг нь цуцалжээ. Гэвч сүүлд лавлагаа гаргуулахад Урт нэртэй хуулийн ашиглахыг хориглосон талбайтай давхцаагүй гэсэн хариу гарчээ. Ингээд уг газрынхаа эрхийг сэргээлгэхээр хөөцөлдөж эхэлтэл уг талбайд “Мондулаантрейд” компани ямар нэг бичиг баримтгүйгээр 2015 оны 12 дугаар сарын 4-ний өдрөөс хөрс хуулж эхэлсэн нь тогтоогдсон байна. Энэ дагуу “Авдарбаян” компаниас МХГ болон холбогдох байгууллагуудад хандсаны хариуд “Мондулаантрейд” компанид 13 сая төгрөгийн торгууль тооцож, үйл ажиллагааг нь зогсоох шаардлага хүргүүлсэн ч өдгөөг хүртэл хууль бус ажлаа зогсоохгүй байна. Заамар сумын Засаг дарга Д.Болормаа, сум дундын цагдаагийн хэлтсийн дарга нарт хандсан ч хууль бус үйл ажиллагааг зогсоохгүй байна гэв. “Мондулаантрейд” компани бичиг баримт зөвшөөрөлгүйгээр хөрс хуулалтын ажил хийж, өнгөрөгч бямба гаригаас алттай шороог тээвэрлэж, зөөх, угаах ажлыг эхлүүлжээ. Орон нутагт энэ мэт хууль бус олборлолтын ажиллагаа болж байгааг Уул уурхайн яам, төр засаг анхааралдаа авахыг тэд санууллаа.

Ж.Батсайхан

 

Холбоотой мэдээ