Улаанбаатар
Ерөнхийлөгч В.Путин СТХ-ны тэргүүнийг шинэ бүрэлдэхүүнээс хасчээ
МОНГОЛЫН МЭДЭЭ | УЛС ТӨРЕрөнхийлөгч В.Путин тус улсын Сонгуулийн Төв хороог /СТХ/ бүрдүүлэх ерөнхийлөгчийн квотыг бүрдүүлэх тухай зарлигт гарын үсэг зурлаа.
2007 оноос Оросын СТХ-ны тэргүүний албан тушаалыг хашсан Владимир Чуров орсонгүй. Шинэ бүрэлдэхүүнд Хүний эрхийн Бүрэн эрхт төлөөлөгч Элла Памфилова, Төрийн думын депутат Василий Лихачёв, Шударга өрсөлдөөний байгууллагын дэд тэргүүн Александр Кинёв болон СТХ-ны одоогийн бүрэлдэхүүнээс Борис Эбзеев болон Евгений Шевченко нар оржээ.
Орос улсын СТХ -ны одоогийн бүрэлдэхүүний бүрэн эрхийн хугацаа энэ 3 дугаар сарын сүүлээр дуусч буй юм. Тус улсын Үндсэн хуульд зааснаар Төрийн дум, Холбооны зөвлөл болон Ерөнхийлөгч нь СТХ-ны бүрэлдэхүүнд өөрсдийн нэр дэвшигчдийг сонгох ёстой аж. Иймд үүний өмнө Оросын парламентын дээд, доод танхимаас өөрсдийн төлөөлөгчдийн нэрсийн жагсаалтыг баталсан билээ. Оросын СТХ-ны шинэ бүрэлдэхүүний 15 гишүүний 6 нь өмнөх бүрэлдэхүүнээс улирч ажиллана.
Хэвлэлүүдийн бичиж буйгаар СТХ-ны тэргүүнээр Элла Памфилова томилогдож болзошгүй байна. Тэрбээр Зөвлөлт, Оросын төр-нийгмийн зүтгэлтэн, эрх зүйч мэргэжилтэй, СТХ –ны арвин туршлагатай нэгэн аж . Хатагтай Памфилова 2014 оноос ОХУ -ын Хүний эрхийн Бүрэн эрхт төлөөлөгчөөр ажиллаж буй юм.
Оросын иргэд эл томилгоог ирэх 9 дүгээр сард тус улсад болох Төрийн думын ээлжит сонгуультай холбон үзэж эерэгээр хүлээн авч байна.
Москва хот. А.Огторгуймаа
