Улаанбаатар
Ажил мэргэжлийн улсын уралдаанд “Найрамдлын Залуус” манлайллаа
ОРОН НУТГИЙН МЭДЭЭ | ДАРХАН-УУЛ
Дархан-Уул /МОНЦАМЭ/. “Нийгмийн даатгал-Миний мэргэжил” ажил
мэргэжлийн улсын уралдаан 2018 оны 11 дүгээр сарын 30-ны өдөр Улаанбаатар
хотноо амжилттай зохион байгуулагдаж өндөрлөжээ.
Тус уралдааныг 7 бүсэд урьдчилан зохион
байгуулсан аж. Тэдгээрээс шалгарсан
Увс, Өмнөговь, Дархан-Уул, Сүхбаатар, Өвөрхангай аймгууд болон Баянзүрх,
Сүхбаатар дүүргийн нийгмийн даатгалын хэлтсийн байцаагчид
ажил мэргэжлээрээ өрсөлдсөнөөс Дархан-Уул аймгийн
“Найрамдлын залуус” баг шилдгийн шилдгээр шалгарчээ.
Харин удаах байрт Баянзүрх дүүргийн “Нэг зүрх” баг, Увс аймгийн “Увс
нуур” багууд шалгарч улсын уралдаанд манлайлж бусдаасаа шалгарч шилдэгүүд болсон
байна.
Уралдааны үеэр байцаагчид нийгмийн даатгалын бодлого бодож, тооцоолол хийх, кэйс дээр
ажиллах, асуулт хариулт, АХА тэмцээн болон жүжигчилсэн тоглолтоор өөр хоорондоо
өрсөлдөж, ур чадвараа сайжруулан, харилцан туршлага солилцлоо.
16 жилийн дараа амжилттай зохион байгуулагдсан тус
уралдааныг цаашид дөрвөн жил тутамд зохион байгуулахаар тогтжээ.
Нийгмийн даатгалын байгууллага нь 21 аймаг, 329 сум, нийслэл,
9 дүүрэг, БНСУ дахь салбар нэгжээрээ дамжуулан давхардсан тоогоор 7.5 сая
даатгуулагчид 30 нэр төрлийн үйлчилгээ үзүүлдэг.
Эдгээр иргэдэд нэг удаагийн болон насан туршид нь авах
тэтгэвэр, тэтгэмж, төлбөрийг тооцоолон олгоно гэдэг нь хариуцлагатай ажил бөгөөд
нийгмийн даатгалын байцаагчийн мэдлэг, ур чадварын дутмаг байдлаас болж
даатгуулагч дутуу тогтоогдсон тэтгэвэр, тэтгэмж авч хохирч болохгүй.
Иймд нийгмийн даатгалын байгууллагаас байцаагч
ажилтнуудаа чадавхжуулах ажлын хүрээнд ажил мэргэжлийн улсын уралдааныг ийнхүү
зохион байгуулжээ.
