Гишүүдийн олонхийн саналаар УИХ-ын даргыг чөлөөлөх хуулийн төсөл өргөн мэдүүлнэ
МОНГОЛЫН МЭДЭЭ | УЛС ТӨРУлаанбаатар /МОНЦАМЭ/. Ерөнхийлөгч Х.Баттулга УИХ-ын тухай, УИХ-ын чуулганы хуралдааны дэгийн тухай хуульд нэмэлт оруулах тухай хуулийн төсөл боловсруулжээ. Энэ талаар өнөөдөр Ерөнхийлөгчийн Тамгын газрын дарга З.Энхболд мэдээлэл хийв.
Тэрбээр, “Дээрх хуулийн төслүүдэд УИХ-ын даргыг чөлөөлөх заалтыг нэмж
тусгасан. УИХ-ын тухай хуульд, “УИХ-ын гишүүдийн олонх УИХ-ын даргыг үүрэгт
ажлаас нь чөлөөлөх саналыг албан ёсоор гаргаж, тогтоолын төсөл өргөн мэдүүлснийг
чуулганаар баталсан тохиолдолд чөлөөлнө” гэсэн заалт нэмэхээр тусгасалаа. Мөн УИХ-ын дэгийн тухай
хуульд, “УИХ-ын даргыг чөлөөлөх асуудлыг нэн яаралтай дэгээр хэлэлцэнэ” гэсэн нэмэлт оруулж байгаа юм. Хуулийн төслүүдийг өнөөдөр өргөн мэдүүлэхээр
төлөвлөж, УИХ-ын Тамгын газарт хүргүүлсэн боловч зарим бичиг баримтын бүрдэл
дутуу гэсэн шалтгаанаар түр хойшлуулаа. Маргааш буюу энэ сарын 04-нд дутуу бичиг баримтуудыг
бүрдүүлэн өргөн мэдүүлэх болно. УИХ-ын хамгийн сүүлчийн чуулган арванхоёрдугаар
сарын 06-нд хуралдсан. Үүнээс хойш чуулган огт хуралдаагүй тул төрийн үйл
ажиллагааг тогтвортой явуулах үүднээс энэ хуулийн төслийг өргөн мэдүүлэх болсон
юм” гэлээ.