Ёшихидэ Сүга АНУ-д айлчилна
ДЭЛХИЙН МЭДЭЭ | УЛС ТӨРТОКИО. /NHK/. Японы Засгийн газрын өндөр түвшний төлөөлөгч энэ
долоо хоногийн эцсээр АНУ-д айлчилж, тус улсын дэд Ерөнхийлөгч Майк Пенс,
Төрийн нарийн бичгийн дарга Майк Помпео нартай уулзана.
Сайд нарын танхимын Ерөнхий
нарийн бичгийн дарга Ёшихидэ Сүгагийн АНУ-д хийх дөрөв хоногийн айлчлал пүрэв гарагаас эхэлнэ. Түүний
айлчлал БНАСАУ-д хулгайлагдсан Япон иргэдийн асуудлыг шийдэх хийгээд Окинава дахь
АНУ-ын цэргийн хүчнүүдийн нөлөөг сулруулах зорилготой ажээ.
Ё.Сүга АНУ-ын төлөөлөгчидтэй БНАСАУ-ын өнгөрсөн бямба гарагт явуулсан
туршилтын талаар мөн хэлэлцэх төлөвтэй байна. Үүний зэрэгцээ тэрбээр БНАСАУ-ыг цөмийн
зэвсгээс бүрэн ангижруулах үйл хэрэгт хамтран ажиллана гэдгээ дахин нотлохоор
төлөвлөж байгаа юм.
Ерөнхий сайд Шинзо Абэ хулгайлагдсан иргэдийн асуудлыг шийдэх зорилгоор БНАСАУ-ын
удирдагч Ким Жөн Унтай урьдчилсан нөхцөлгүйгээр уулзах хүсэлтэй байгааг Ё.Сүга
дамжуулж, уулзалтыг ойрын хугацаанд зохион байгуулахад дэмжлэг үзүүлэхийг АНУ-ын
талаас хүсэх ажээ.
Японы Засгийн газраас мэдээлснээр, 1970, 1980-аад оны үед БНАСАУ-ын
төлөөлөгчид наад зах нь 17 Япон иргэнийг хулгайлсан ажээ. 2002 онд болсон дээд
хэмжээний уулзалтын дараа тэдгээр иргэний тавыг нутаг буцаасан боловч бусад нь сураггүй хэвээр байгаа юм.