Японы парламент АНУ-тай байгуулсан худалдааны гэрээг баталжээ

Дэлхийд | Эдийн Засаг
Jargal.d@montsame.mn
2019-12-04 14:23:10

ТОКИО. /TASS/. Японы парламентын дээд танхим лхагва гарагт хийсэн нэгдсэн хуралдаанаараа АНУ-тай байгуулсан худалдааны гэрээг соёрхон баталжээ. Эрх баригч Либерал ардчилсан нам болон түүний холбоотнуудаас сонгогдсон депутатуудын олонх нь холбогдох хуулийг батлахыг дэмжлээ гэж Японы телевизийн бүх суваг мэдээлсэн байна.  


Хэдийгээр Токио Японы автомашин, автомашины сэлбэг хэрэгслийн экспортын татварыг бууруулж, цаашлаад татвараас чөлөөлж чадаагүйд дургүйцэж буй сөрөг хүчнийхэн гэрээг батлахыг эсэргүүцсэн боловч тус улсын парламентын доод танхим  11 дүгээр сард баталжээ. 


Нэгдүгээр сарын 1-нээс хэрэгжиж эхлэх одоогийн гэрээнд заасны дагуу, жилд 7 тэрбум 2 сая ам.долларын өртөг бүхий Америкийн хөдөө аж ахуйн бүтээгдэхүүнийг Японд импортлоход төлөх татварыг цуцлах буюу нэлээд хэмжээгээр бууруулна. Тухайлбал, Америкт үйлдвэрлэсэн үхрийн махны импортын татварыг одоогийн 38.5 хувиас 26.6 хувьд хүргэж, эцэст нь 9 хувь болгож бууруулах ажээ. Америкийн гахайн мах, бяслаг, мөн дарсны татварыг аажмаар тэглэхээр болсон байна.


Харин автомат суурь машин зэрэг Японы аж үйлдвэрийн зарим бүтээгдэхүүнийг АНУ-д импортлох татварыг хэд хэдэн үе шаттайгаар цуцална. Түүнчлэн үхрийн мах, шар буурцагны цуу, хөгжмийн хэрэгсэл, унадаг дугуй зэрэг 42 нэр төрлийн бараа бүтээгдэхүүний татварыг бууруулахаар болсон байна. АНУ мөн Японы автомашины импортын татварыг нэмэхгүй байхыг зөвшөөрчээ.


Япон, АНУ-ын худалдааны гэрээг есдүгээр сард Нью-Йорк хотод байгуулсан байна.


Холбоотой мэдээ