Сурагчдын хичээлийн амралтыг долоо хоногоор сунгалаа
ОРОН НУТГИЙН МЭДЭЭ | ӨВӨРХАНГАЙ
Өвөрхангай /МОНЦАМЭ/. Өнөөдөр аймгийн Онцгой комисс хуралдаж, томуу, томуу төст
өвчлөлийн өнөөгийн байдал, цаашид анхаарах асуудлын талаар хэлэлцэн сурагчдын улирлын амралтыг сунгалаа.
Тухайлбал, ерөнхий боловсролын сургуулийн сурагчдын улирлын амралтыг 7
хоногоор, сургуулийн өмнөх боловсролын байгууллагуудын үйл ажиллагааг
түр зогсоосон шийдвэрийг мөн 7 хоногоор сунгахаар тогтлоо. 2019 оны 12 дугаар сарын 30-наас 2020 оны 1 дүгээр сарын 5 хүртэлх хугацаанд аймгийн хэмжээнд 4506 хүн амбулаториор үйлчлүүлсний 844 нь томуу, томуу төст өвчлөлөөр оношлогдсон бөгөөд уг өвчлөл дэгдэлтийн түвшинд байна. Сүүлийн 3
хоногийн байдлаар амбулаторийн үзлэгт 4820 хүн
үйлчлүүлсний 695 нь томуу, томуу төст өвчлөлийн шалтгаанаар эмнэлгийн
байгууллагад ханджээ. Нийт сумаас 13 суманд амбулаторийн үзлэгээс
томуу томуу төст өвчний эзлэх хувь 15-аас дээш байгаа тул Онцгой комиссын хурлаас ийнхүү шийдвэрлээд байгаа юм.
Аймгийн хэмжээнд сургууль, цэцэрлэгийн үйл ажиллагаа 2020 оны 1 дүгээр сарын 20-ны өдрөөс хэвийн эхлэх аж.