Фижид 15 жилийн дотор 30 сая мод тарина

Дэлхийд | Байгаль орчин
khulan@montsame.gov.mn
2020-01-10 14:21:44

СУВА. /Xinhua/. Фижи улсын Засгийн газар байгаль орчноо хайрлан хамгаалах зорилгоор 15 жилийн хугацаанд 30 сая мод тарих зорилт тавьсан талаар тус улсын Ойн сангийн асуудал хариуцсан сайд Осеа Найкаму баасан гарагт мэдээлжээ.


О.Найкаму Найтасири мужид мод тарих санаачилгыг эхлүүлэх үеэрээ хэлэхдээ, Засгийн газрын харьяа байгууллагуудын ажилтнуудын 60 хувийг мод тарих ажилд оролцуулна гэжээ. Тэдгээр ажилтан мөн хууль бусаар мод бэлтгэх гэх мэт үйлдлийг таслан зогсоох чиглэлд ажиллах ажээ.


Энэ оны эцэс гэхэд Найтасири, Тайлеву, Рева мужид 510 мянга гаруй мод тарихаар төлөвлөсөн бөгөөд худалдаалах боломжтой, удаан ургах мод тарьсан газрын эздэд Засгийн газраас урамшуулал олгох гэнэ.


НҮБ-ын “Тогтвортой хөгжил-2030” хөтөлбөрийн хүрээнд Засгийн газраас дээрх санаачилгыг хэрэгжүүлжээ. Фижид мод тарих зорилтыг цаашид улам нэмэгдүүлэх бөгөөд “4 жилд 4 сая”-аас эхлэн “15 жилд 30 сая” мод тарихаар төлөвлөсөн байна.


“Уур амьсгалын өөрчлөлттэй тэмцэхэд Фижи улсын гаргаж буй хүчин чармайлтын нэгээхэн хэсэг нь энэхүү зорилт юм” гэж Ойн сангийн асуудал хариуцсан сайд хэлжээ. 

Холбоотой мэдээ