Улаанбаатар
Эрдэмтэд шар тостой саван үйлдвэрлэж байна
МОНГОЛЫН МЭДЭЭ | НИЙГЭМ
Улаанбаатар /МОНЦАМЭ/. ШУА-ийн Биологийн хүрээлэн шар тостой саван үйлдвэрлэж эхэллээ.
Тус хүрээлэнгийн Микробын нийлэгжлийн лаборатори 2017 оноос органик саван үйлдвэрлэх, найрлагыг баяжуулах туршилт судалгааг явуулж эхэлсэн юм. Өдгөө бүтээгдэхүүний нэр төрлөө өргөжүүлэн сэвх нөсөө толбо бүдгэрүүлэх, цайруулах үйлчилгээ бүхий барагшунтай, бактерийн эсрэг үйлчилгээтэй эфирийн тостой, зөөлрүүлж, чийгшүүлэх сүүлний тостой, тэжээл өгөх, хөгшрөлтийн эсрэг үйлчилгээтэй шар тостой, шоколадны анхилам үнэртэй гуужуулагчтай зэрэг олон төрлийн орц, найрлагатай органик саван үйлдвэрлэж байна.
Органик саван хэрэглэснээр химийн найрлагатай савангаас
үүдэлтэй арьсыг цочроох, хуурайшуулах асуудлыг шийдэх боломжтой юм. Органик бус
савангийн найрлагад парабен, фталат, нефтээс гаралтай химийн бүтээгдэхүүн,
нийлэг өнгө, үнэр оруулагч бодис ордог бөгөөд эдгээр нь хүний биед харшил үүсгэх,
батгаших, хуурайших, загатнах зэрэг таагүй нөхцөлийг бүрдүүлдэг.
Харин органик савангийн найрлагад цэвэр байгалийн гаралтай
тос болон нэмэлт бүтээгдэхүүн агуулдаг. Тухайлбал, наргил модны тос, оливийн
тос, сүүлний тос, шар тос нь арьсны рН тэнцвэржүүлж, тэжээл өгч чийгшүүлэх үйлчилгээтэй.
Эфирийн тосыг нэмснээр байгалийн ургамлын үнэр оруулахаас гадна бүтээгдэхүүний
хадгалалтыг уртасгах, бактерийн эсрэг давхар үйлчилгээтэй болгодог. Мѳн органик
саванг биологийн идэвхт нэгдэл (эфирийн тос, барагшун гэх мэт)-ээр баяжуулснаар
тухайн бүтээгдэхүүний чанар, нэр төрөл, хэрэглэх хүрээг тэлэх бүрэн
боломжтой аж.
