Англи иргэнээс авсан шинжилгээний сорьцыг ХӨСҮТ-д хүлээлгэн өглөө
ОРОН НУТГИЙН МЭДЭЭ | УВСУвс /МОНЦАМЭ/. Англи иргэнээс авсан шинжилгээний сорьцыг өнөөдөр 15.00 цагт ХӨСҮТ-д хүлээлгэн өгсөн байна. Аймгийн Онцгой комиссоос тусгай ажлын хэсэг гарч, энэ сарын 10-ны өдөр Бөхмөрөн сум руу явсан бөгөөд тэд коронавирусний халдвараар өвчилсөн Франц улсын иргэний 1-р хавьтагч болох Английн иргэнээс энэ сарын 11-ний өглөө шинжилгээ авсан юм.
Уг шинжилгээг түүнтэй хамт явсан орчуулагч, жолооч гэх мэт бусад хүмүүсээс ч гэсэн авсан байна. Тусгай ажлын хэсгийн гишүүд энэ сарын 10-ны шөнө Бөхмөрөн сумын Ямаат ууланд очиж, тусгаарлагдсан англи иргэнээс болон бусад хүмүүсээс шинжилгээ аваад шөнөдөө буцаж ирж Улаанбаатар руу өөр машинд сорьцоо өгч явуулах байсан ч замдаа цасанд сууж, машинуудаа ээлжилж татсаар байж цаг алдан, өглөө үүрээр Ямаатад очсон байна.
Ямартай ч тэд шинжилгээгээ горимын дагуу авч, улмаар энэ сарын 11-ний 17
цаг 45 минутад Улаанбаатар хот руу илгээгээд байсан юм. Сорьц тээвэрлэсэн
автомашин Улаанбаатар хотод саадгүй хүрсэн байна.
Англи иргэний биеийн байдал одоогоор хэвийн байгаа аж.