АНУ Ираны эсрэг хориг арга хэмжээг өргөтгөжээ

Дэлхийд | Эдийн Засаг
ayanzaya@montsame.gov.mn
2020-03-20 14:02:03

ВАШИНГТОН. /TASS/. АНУ-ын эрх баригчид АНЭУ-д байрладаг Ираны 5 компанийн эсрэг хязгаарлалтын арга хэмжээ авч, Ираны эсрэг хориг арга хэмжээний жагсаалтаа өргөтгөжээ. Энэ тухай АНУ-ын Сангийн яам мэдэгдсэн байна.


Хориг арга хэмжээний жагсаалтад “Alam Althrwa General Trading L.L.C, Alphabet International Dmcc, Alwaneo L.L.C. CO., Petro Grand FZE, Swissol Trade DMCC” компаниуд багтжээ. АНУ-ын эрх баригчдын үзэж байгаагаар, эдгээр компани газрын тос, газрын  тосны химийн бүтээгдэхүүнийг худалдахад нь Ираны дэглэмд дэмжлэг үзүүлдэг байна.


“2009 онд энэ 5 компани Ираны үндэсний газрын тосны компаниас нийтдээ хэдэн зуун мянган тонн газрын тос худалдан авчээ. Газрын тос болон газрын тос химийн салбар нь Ираны дэглэмийн орлогын гол эх үүсвэр нь болдог бөгөөд энэ салбараас олсон мөнгийг террорист бүлэглэлүүдэд дэмжлэг үзүүлэх зэргээр Ойрхи Дорнод дахь Ираны Хувьсгалт гвардын хорлонтой үйл ажиллагааг дэмжихэд зориулж зарцуулдаг” хэмээн Сангийн яамны мэдэгдэлд дурдсан байна.


Түүнчлэн эдгээр 5 компанийн 3 нь Иранаас газрын тос нийлүүлсэн мэдээллээ нуун дарагдуулах зорилгоор хуурамч бичиг баримт үйлдсэн гэж үзэж байгаа аж. 

Холбоотой мэдээ