Архангай аймгаас гарах хөдөлгөөнийг түр зогсоожээ

Орон нутагт | Архангай
gereltod@montsame.mn
2020-12-08 17:59:56

Архангай /МОНЦАМЭ/. Архангай аймгаас гарах хөдөлгөөнийг 12 дугаар сарын 8-наас эхлэн түр хугацаагаар зогсоожээ.

Өчигдөр буюу 12 дугаар сарын 7-ноос эхлэн голомттой аймгуудаас хөдөлгөөн нээсэнтэй холбоотой нийслэл рүү орох 22-ын товчоон дээр бөөгнөрөл үүсч, хүний амь эрсэдсэн асуудал ч гарсан байна. Тодруулбал, орон нутгуудад түргэвчилсэн оношилгоо хийлгэсэн иргэд нийслэл рүү орохдоо PCR шинжилгээнд хамрагдахаар зохион байгуулжээ. Гэтэл шинжилгээний хариуг дор хаяж 10 цаг хүлээснээс ийм дараалал үүссэн байна.

Энэ нөхцөл байдлаас шалтгаалж, өнөөдрөөс буюу 12 дугаар сарын 8-наас эхлэн аймгаас нийслэл рүү зорчих хөдөлгөөнийг зогсоожээ.

12 дугаар сарын 7-нд 40 зорчигчтой нэг автобус, мөн сумдаас хувийн 60-аад машинтай 100 гаруй хүн Архангайгаас Улаанбаатар руу гарсан. Харин өнөө өглөө 47 зорчигчтой 2 автобус гарсан. Хувийн машинуудыг гаргаагүй аж.

Архангайд тохиолдол бүртгэгдэж 12 дугаар сарын 11-нийг хүртэл бүх нийтийн бэлэн байдлын зэрэгт шилжсэн хэвээр байгаа. 

Холбоотой мэдээ