Улаанбаатар
Унгар улстай кино урлагийн салбарын хамтын ажиллагааг хөгжүүлнэ
МОНГОЛЫН МЭДЭЭ | СОЁЛ УРЛАГ
Улаанбаатар /МОНЦАМЭ/. Соёлын сайд С.Чулуун Унгар Улсаас Монгол Улсад суугаа Элчин сайд Борбала Обрушанскийтай энэ сарын 15-нд цахим уулзалт хийлээ.
Соёлын сайд С.Чулуун Унгар Улсын Элчин сайдад Монгол Улсад
суух Элчин сайдаар томилогдсонд болон 2020 онд Монгол Улс, Унгар Улс дипломат харилцаа тогтоосны 70
жилийн ой тохиож байгаад баяр хүргэв.
Унгар Улсын Элчин сайд Борбала Обрушанский Соёлын яам
байгуулагдсанд баяр хүргэн Соёлын сайд С.Чулуунд ажлын өндөр амжилтыг хүргэж
цаашид Монгол Улстай Кино урлагийн салбарын хамтын ажиллагааг хөгжүүлэх тухай
онцлон дурдаж, хоёр улсын хамтарсан түүхэн болон уран сайхны кино бүтээх хамтын
ажиллагааг Унгар Улсын Засгийн газар дэмжиж байгааг илэрхийллээ.
Мөн Монгол Улсын Үндэсний номын сан Унгар Улсын Үндэсний
номын сантай хамтарсан гэрээ байгуулах, Археологи, Угсаатны музейн хамтын
ажиллагааг өргөтгөх, сонгодог урлаг, соёлын чиглэлээр мэргэжилтэн бэлтгэх,
харилцан “Хүннүгийн түүх-Ази ба Европт” үзэсгэлэн гаргах асуудлуудыг хамтран
хийхээр тохиролцов.
Талууд уулзалтын үеэр 2021 онд Ардын хувьсгалын 100 жилийн ойд зориулан жанжин Д.Сүхбаатарын эмч байсан Раднотийн холбогдох гэрэл зургийн цуглуулгаар үзэсгэлэн гаргах тухай ярилцаж, цаашид соёл, урлагийн чиглэлээр богино болон урт хугацааны сургалтад уран бүтээлчдийг хамруулах, номын сан, музей, архив болон соёлын өв дурсгалтай ажлуудад хамтарч ажиллах талаар санал солилцов.
