Тусламжийн тэжээлийг аппликэйшнээр хянан малчдад хүргэж байна

МОНГОЛЫН МЭДЭЭ | БАЙГАЛЬ ОРЧИН
192@montsame.mn
2021-02-18 16:43:45

Улаанбаатар /МОНЦАМЭ/. ХХААХҮЯ-нд хэрэгжиж буй Дэлхийн банкны “Мал аж ахуйн эдийн засгийн эргэлтийг нэмэх төсөл”-өөс нийт 5 сая ам.долларын буцалтгүй тусламжаар өвөлжилт хүндэрсэн аймгуудын отроор явж буй малчин өрх, малчдад нэг өрхөд дунджаар 300 мянга орчим төгрөгийн үнэ бүхий тэжээлийн тусламж үзүүлэх шийдвэр гарсан.

Нийт 45 мянга гаруй малчин өрхөд 11800 тонн тэжээл хүргэх ажлыг аймаг, орон нутгийн Онцгой комисс, Хүнс, хөдөө аж ахуйн газар хариуцан ажиллаж байна. Тусламж эзэндээ хүрсэн эсэх түгээлтийн бүртгэлийг "Тэжээл" аппликэйшнээр дамжуулан баталгаажуулж байна.  2 дугаар сарын 18-ны байдлаар: 

  • Говь-Алтай аймагт нийт 630 тонн тэжээл ирснээс 330 тонныг 10 сумын малчин өрхүүдэд олгосон. Одоогоор 300 тонн тэжээлийг аймаг хүлээж аваад сумуудад тараах ажлыг зохион байгуулж байна. 
  • Өмнөговь аймгийн 10 сумын 4017 малчин өрх тусламжид хамрагдана. Үүнээс Гурвантэс суманд 149 тонн тэжээл олгохоос 132 тонн тэжээл олгосон. Бусад суманд хүргэх ёстой тэжээлийг 100 хувь хүргэсэн, сумдаас малчдад олгох ажил үргэлжилж байна. 
  • Баянхонгор аймагт 790 тонн тэжээл ирснээс жигд хүртээмжтэй олгох зорилгоор сум бүрд 35 тонн, өрх бүрд хоёр тонноор хувиарлан түгээсэн. Нэмж 2000 гаруй тонн тэжээл ирэхээр хүлээгдэж байна.  
  • Дундговь аймагт 1878 тонн тэжээл ирэхээс 936 тонныг нь малчдад тараагаад байна. 
  • Өвөрхангай аймагт 16398 өрхөд 4100 орчим тонн тэжээл олгохоос 920 тонныг олгосон мэдээтэй байна.

Холбоотой мэдээ