Аймгийн Засаг дарга Д.Бауыржан "Наурыз" баярын мэндчилгээ дэвшүүллээ

ОРОН НУТГИЙН МЭДЭЭ | БАЯН-ӨЛГИЙ
bayanulgii@montsame.gov.mn
2021-03-22 09:17:21

Баян-Өлгий /МОНЦАМЭ/. Баян-Өлгий аймгийн Засаг дарга Д.Бауыржан казахын ард түмний шинэ жилийн баяр болох "Наурыз" баярыг тохиолдуулан ард иргэдэд мэндчилгээ дэвшүүллээ.

Тэрээр мэндчилгээндээ, "Үндэстэй бүхэн урган дэлгэрч, үртэй бүхэн өсөн үрждэг урин хаврын эхлэл уламжлалт Наурызын баярыг тохиолдуулан эх орны өнцөг булан бүрт аж төрөн амьдарч буй нийт казах ахан дүүстээ баярын мэндийг хүргэе.

Өдөр, шөнө тэнцэх хаврын энэ сайхан өдөр өтгөс буурлууддаа хүндэтгэн золгож, залуу хойч үе, үр ач нартаа сургамж сургаалаа хайрлаж, баяр хөөр болон тэмдэглэдэг уламжлалтай.

Энэ жилийн Наурызын баяр дэлхий дахиныг түгшээсэн халдварт өвчин  тархсан амаргүй цаг үед тохиож байна. Тиймээс Та бид болзошгүй өвчний аюулаас урьдчилан сэргийлж, сонор сэрэмжээ дээшлүүлэх нь маш чухал. Аюулт өвчнөөс сэргийлэх зорилгоор гаргасан төр засгийнхаа шийдвэрийг хүндэтгэн, хариуцлагаа ухамсарлаж, гэр бүл, ойр дотнын хайртай хүмүүсийн эрүүл мэндийн төлөө Наурызын баяраа золголт хийхгүйгээр, гэр бүлийн хүрээнд тэмдэглэхийг уриалж байна. Мөн аксакал буурал, ахан дүүсийнхээ амар мэндийг цахимаар айлтган золгохыг уриалж байна.

Айл өрх бүрийн амьдрал өөдлөн дэвшиж, нутаг ус маань хөгжин дэвжиж, түмэн олноороо эрүүл энх байхын өлзийтэй ерөөлийг өргөн дэвшүүлье" хэмээжээ. 

Холбоотой мэдээ