ААН-үүд 1146 тусгай зөвшөөрлийн төлөвлөгөө тайлангаа ирүүлжээ

Монголын мэдээ | ЭДИЙН ЗАСАГ
192@montsame.mn
2022-05-04 12:29:52

Улаанбаатар /МОНЦАМЭ/. “Монголын геологи, хайгуул-2022” чуулга уулзалт болж байна. Манай улс энэ онд 20 тонн алт олборлох төлөвлөгөөтэй. Ингэснээр Засгийн газраас “Алт-2” хөтөлбөрийг эрчимжүүлж, алт олборлогч ААН-үүдийн үйл ажиллагааг Эдийн засгийг эрчимжүүлж сэргээх бодлогын хүрээнд дэмжин, улмаар баялгийн нөөцийг ихэсгэн гадаад валютын нөөцийг нэмэгдүүлэхийг зорьж байна. Үүнд ашигт малтмалын ашиглалтын болон хайгуулыг нэмэгдүүлэх нь чухал байгаа юм.

АМГТГ-ын мэдээллээр ашигт малтмалын хайгуулын тусгай зөвшөөрлийг 800 ААН-д олгожээ. Энэ онд ААН-үүд 1146 хайгуулын болон ашиглалтын тусгай зөвшөөрлөөр үйл ажиллагаагаа явуулах төлөвлөгөө тайлангаа ирүүлсэн.


Өнөөдрийн байдлаар эдгээрээс 65 хувь нь төлөвлөгөө батлуулаад байгааг АМГТГ-аас өнөөдрийн чуулган дээр мэдээллээ. Эдийн засгийг эрчимжүүлж сэргээх бодлогын хүрээнд энэ оны төлөвлөгөөг энэ сарын 15-ны дотор батлахаар ажиллаж байгаа аж. Хайгуулын төлөвлөгөөнөөс гадна нөөц өсгөх, гүйцээх хайгуул хийх, ашиглалтын үйл ажиллагааны төлөвлөгөөний тайланг батлах юм. Улмаар энэ онд хийх ажлын үр дүнгээр зэсийн болон алтны, шороон ордуудын нөөц нэмэгдэнэ гэсэн хүлээлттэй байна. Энэ оны 4 дүгээ сарын 20-ны байдлаар.

  • Алтны 23 тайлан,
  • Бусад ашигт малтмалын 30 тайлан Эрдэс баялгийн зөвлөлөөр ороод байна. 

Хайгуулын тусгай зөвшөөрлийн тоо жил бүр буурч өнөөгийн байдлаар ашиглалтын тусгай зөвшөөрлийн тооноос 2 дахин бага байна. 2011 онтой харьцуулахад хайгуулын тусгай зөвшөөрөл 2.8 дахин, хайгуулын ажилд зарцуулсан хөрөнгө оруулалт 3.4 дахин буурчээ.
Иймд энэ салбарын үйл ажиллагааг эрчимжүүлэх, дотоод, гадаадын хөрөнгө оруулалтыг татах таатай нөхцөлийг бүрдүүлэх зорилгоор
УУХҮЯ, хэрэгжүүлэгч агентлаг АМГТГ ашигт малтмалын хайгуулын тусгай зөвшөөрлийг сонгон шалгаруулалтаар олгох ажиллагааг бүрэн цахимжуулж, хайгуулын тусгай зөвшөөрөл олгох ажлыг 3-4 дахин нэмэгдүүлэхээр бэлтгэл ажлыг хангаад байна. Ингэснээр ашигт малтмалын нөөцийг өсгөх, улс орны эдийн засагт нөлөөлөхүйц томоохон орд газрыг нэмж илрүүлэх боломж бүрдэх юм.


Холбоотой мэдээ