ДУНДГОВЬ: Өвөлжилтийн бэлтгэл ажлыг 85 хувьтай хангажээ
ОРОН НУТГИЙН МЭДЭЭ | ДУНДГОВЬДундговь /МОНЦАМЭ/. Аймгийн ХХААГ-ын мэдээлснээр 2022-2023
оны мал аж ахуйн салбарын өвөлжилтийн бэлтгэл хангалт Дундговь аймагт 85 хувьтай
байна.
Аймаг, сумын Засаг даргын аюулгүй нөөцөд
800 тн бэлтгэхээс 974,4 тн, 510 тн тэжээл бэлтгэхээс 365,7 тонныг нөөцөлжээ. Харин малчид (тэжээлийн
нэгжид шилжүүлснээр) 19911,1 тн гар тэжээл бэлтгэхээс 8374,1
тн бэлтгэсэн нь 40,5 хувьтай байгаа аж.
2022-2023 онд 7670
малчин өрхийн 3,8 сая мал хонин толгойд шилжүүлснээр 5,2 сая толгой мал өвөлжиж, хаваржих төлөвтэй байгаа.
Мэргэжлийн байгууллагаас гаргасан
мэдээгээр аймгийн нийт нутгийн 50,0 хувьд мал өвөлжилт, хаваржилт хэвийн байх
боломжтой, харин нийт нутгийн 37,0 хувьд бэлчээрийн даац 1-3 дахин хэтэрсэн,
5,0 хувьд 3-5 дахин хэтэрсэн, 8,0 хувьд олон дахин хэтэрчээ. Нийт нутгийн 23,0
хувьд нь бэлчээрийн нөөц 50 хувь, 27 хувьд бэлчээр хүрэлцээтэй гэсэн дүгнэлт
гарчээ.
2022 оны 10 дугаар сарын 7-8-ны өдрүүдэд
тус аймгийн Эрдэнэдалай суманд 7мм, Дэлгэрхангай, Луус, Сайнцагаан, Хулд
суманд 3-5мм, бусад сумын нутагт 1-2 мм цас орж, 10 дугаар сарын 14-ний байдлаар
ихэнх нутагт цас хайлж нимгэрсэн байна.
Нийт малчин өрхийн 2,3 хувь буюу 181
малчин өрхийн 97961 тоо толгой мал гадны 8 аймаг, нийслэлд, харин 5,2 хувь буюу
404 өрхийн 218594 толгой мал өөрийн аймаг дотор оторлож байна. Тус аймгийн
нутагт Өвөрхангай, Өмнөговь аймгийн 5 сумын 18 өрхийн 19206 мал ирж өвөлжиж
байгааг аймгийн ХХААГ-аас мэдээллээ.
11 дүгээр сарын 2-нд хуралдсан аймгийн удирдлагуудын шуурхай хурлаар өвөлжилтийн бэлтгэл ажлын тухай хэлэлцсэн бөгөөд аймгийн Засаг дарга Ц.Мөнхбат өвөлжилтийн бэлтгэл ажлын явц 85,0 хувьтай байгааг “хангалтгүй байна” хэмээн дүгнэж, аймгийн ХХААГ-т анхааруулан, цаашид авах арга хэмжээний талаар чиглэл өгчээ.