Улаанбаатар
Сумогийн 69 дэх Их аварга М.Даваажаргал тусгай зочинд 69 бэлэг бэлджээ
МОНГОЛЫН МЭДЭЭ | СПОРТ
Улаанбаатар /МОНЦАМЭ/. Мэргэжлийн сумо бөхийн олон дээд амжилтын эзэн, 69 дэх Их аварга Хакүхо М.Даваажаргалын зодог тайлах ёслол ирэх оны нэгдүгээр сарын 28-нд Токио хотын сумогийн “Рёгокү-Кокүгикан” ордонд болно.
Энэхүү хүндтэй ёслолын
дээд зэрэглэлийн тасалбар худалдаанд гарсан бөгөөд 5 сая иенийн үнэтэй 6 ширхэг
“Diamond VIP NFT” тасалбар нь бусад
зочдоос давуу эрхтэй аж. Энэхүү 6 азтан Их аварга М.Даваажаргалын үсэнд хайч
хүрэх эрхээс гадна “Миягино” дэвжээг өвлөн авах ёслолд оролцох, Их аваргатай
хамт зоог барих эрхтэй юм байна. Мөн 69 дэх Ёкозүнаг бэлгэдсэн Хакүхогийн гарын
69 бэлэг тэднийг хүлээж байгаа аж.
Хакүхо М.Даваажаргал 2007 онд мэргэжлийн сумо бөхийн 69 дэх Их аварга буюу Ёкозүна цол хүртэж, 14 жилийн турш дээд зиндаанд 45 удаа түрүүлэн 1187 даваа авсан юм. Тэрбээр 2021 оны Нагоя башёд нэг ч уналгүй 15 даваатай түрүүлж, 45 дахь түрүүгээ хүртэн өөрийн тогтоосон дээд амжилтыг шинэчилсэн билээ.
Мэргэжлийн сумо бөхийн домогт аварга, Монгол Улсын Хөдөлмөрийн баатар Дархан аварга, олимпын мөнгөн медальт Жигжидийн Мөнхбатын хүү Даваажаргал тамирчны замналаа өндөрлүүлээд мэргэжлийн сумо бөхийн дэвжээний эзэн, ояката болж ирээдүйн шилдэг сумочдыг бэлдэх ажилдаа ороод байгаа билээ.
Холбоотой мэдээ
