Улаанбаатар
М.Бадарчийн Үндэсний их баяр наадмаар барилдах эрхийг дөрвөн жилийн хугацаагаар хасав
МОНГОЛЫН МЭДЭЭ | НИЙГЭМ
Улаанбаатар /МОНЦАМЭ/. Үндэсний их баяр наадмыг зохион байгуулах хорооны хурал болж, М.Бадарчийн Үндэсний их баяр наадмаар барилдах эрхийг 2027 оны долдугаар сарын 12-ныг дуустал дөрвөн жилийн хугацаагаар хаслаа.
Тулгар төрийн 2232, Их Монгол Улсын 817, Үндэсний эрх чөлөө, тусгаар тогтнолоо
сэргээн мандуулсны 112, Ардын хувьсгалын 102 жилийн ойн Үндэсний их баяр
наадмын үндэсний бөхийн барилдаанд дөрөв давсан 32 бөхөөс допингийн шинжилгээ
авсан. Монгол Улсын арслан М.Бадарчийн шинжилгээнээс Дэлхийн допингийн
эсрэг агентлагаас гаргасан хориглосон жагсаалтад орсон бодис илэрсэн тул уг
барилдааны бүх давааг хүчингүйд тооцож, улсын арслан цолыг хураах саналыг
Монгол Улсын Ерөнхийлөгчид уламжлахаар тус хурлаас шийдвэрлэв.
Мөн тус хурлаар аймгийн хурц арслан Бүрнээгийн Баянмөнхийг
тав давсанд тооцож улсын начин, өсөх идэр начин Эрдэнэбатын Дашийг зургаа
давсанд тооцож улсын харцага, улсын харцага Сүхбаатарын Сүхбатыг долоо давсанд
тооцож улсын заан, улсын гарьд Цэрэнсодномын Бямба-Отгоныг ес давсанд тооцож
улсын арслан цол олгох саналыг Монгол Улсын Ерөнхийлөгчид уламжлахаар тогтжээ. Мөн улсын аварга Оргихын
Хангайд “үлэмж бадрах” чимэг олгохоор болсныг Засгийн газрын Хэвлэл мэдээлэл, олон нийттэй харилцах газраас
мэдээллээ.
