Улаанбаатар
ДОРНОД: Алга болсон 7 настай З.Сүбээдэйг гурав дахь өдрөө эрэн хайж байна
ОРОН НУТГИЙН МЭДЭЭ | ДОРНОД
Чойбалсан, 2023 оны есдүгээр сарын 28 /МОНЦАМЭ/. Энэ сарын 25-ны 17.00 цагийн үед гэрээсээ гараад одоог хүртэл сураггүй байгаа долоон настай З.Сүбээдэй хүүг эрэн хайх ажиллагаа гурав дахь өдрөө үргэлжилж байна.
Гэрээсээ гарахдаа хар фодволк, формын өмд, цэнхэр углааштай явсан байна. Харсан хүмүүс цагдаагийн байгууллагын 102 дугаарын утас болон ар гэрийнхнийх нь 8894-0346, 8618-0318 дугаарын утсаар холбогдоно уу.
Алга болсон өдрөөс эхлэн 20 гаруй хүний бүрэлдэхүүнтэй
баг эрэн хайх ажиллагааг тасралтгүй явуулсаар байгаа юм. Нэмэлтээр Онцгойгийн 20 алба хаагч, гурван тээврийн
хэрэгсэлтэйгээр хүч нэмэгдүүлэн хайж эхэлжээ. Мөн Чойбалсан хотод болж байгаа
гамшгаас хамгаалах Улсын сургуулилалтад оролцохоор ирсэн нисдэг тэрэгтэй баг эрэн
хайх ажиллагаанд дэмжлэг үзүүлж байна.
Хоёрдугаар ангид сурдаг З.Сүбээдэй Дорнод аймгийн Хэрлэн
сумын хоёрдугаар багийн “Бөмбөгтэй хөшөө”-ний ойролцоох гэрээсээ гараад
сураггүй алга болжээ.
