Улаанбаатар
ОРХОН: Энэ онд 40 гаруй эмч гадаад улсад мэргэжил дээшлүүлэх сургалтад хамрагджээ
ОРОН НУТГИЙН МЭДЭЭ | ОРХОН
Баян-Өндөр,
2023 оны арваннэгдүгээр сарын 21 /МОНЦАМЭ/. Орхон аймаг 2017 оноос хэрэгжүүлсэн “Эмч” хөтөлбөрийн үр дүнд БОЭТ-д Хавдрын Бай
эмчилгээ, Тархины цус харвалт, зүрхний шигдээсийн эмчилгээ, Дурангийн тасаг
байгуулагдаж Ангиографи, томографийн иж бүрэн тоног төхөөрөмжтэй болжээ.
2021-2022 онд тус хөтөлбөрт 250 сая төгрөг
батлагдаж 818 эмч, эмнэлгийн ажилтан мэргэжил, ур чадвараа дээшлүүлсэн бол 2023
онд 175 сая төгрөг батлагджээ.
Энэ онд тус хөтөлбөрийн хүрээнд:
- БНСУ-д ангиографи, хоол судлал, эрүү нүүр, ам судлал, БНХАУ-ын ӨМӨЗО-д сувилахуйн чиглэлээр нийт 40 эмч, сувилагч мэргэжил дээшлүүлжээ.
- Эрүүл мэндийн салбарын 40-өөс дээш насны 400 ажилтан, эмч нарыг бамбай булчирхайн дааврын шинжилгээнд хамруулав.
- Төгсөлтийн дараах сургалтад 112, ажлын байрны сургалтад 2000 гаруй эмч, эмнэлгийн ажилтан хамрагдлаа.
- Нотолгоонд суурилсан анагаах ухаан, эмнэлзүйн заавар ашиглалтыг нэмэгдүүлэх “UpToDate программын хэрэглээг өргөжүүлэх” уралдаанд 35 эмч оролцов.
- Эмч нарын мэргэжлийн ур чадвар, судалгаа, шинжилгээг нэмэгдүүлэх зорилгоор “Эрдэм шинжилгээний бага хурал” зохион байгуулж 30 эмч өөрсдийн судалгаа, эрдмийн ажлаа танилцууллаа
- Эрүүл мэндийн аялал, жуулчлалыг хөгжүүлэх төслийг хэрэгжүүлэхээр ажиллаж байна.
- Гадаад хамтын ажиллагаагаа өргөжүүлж БНСУ-тай Алсын зайн оношилгооны төв байгуулж, хамтран ажиллах санамж бичиг байгууллаа.
- “Сувилахуй ба эрх зүй”, “Сувилагч ба Эрүүл мэнд” аяныг зохион байгуулж Төвийн бүсийн 6 аймгийн 300 гаруй эмч, сувилагч оролцлоо.
Орхон аймагт 2015 онд 10 мянган хүн амд ноогдох их эмчийн тоо 27,4 хувьтай байсан бол “Эмч” дэд хөтөлбөрийг хэрэгжүүлснээр 33,9 болж нэмэгдсэн байна.
