Улаанбаатар
ДОРНОД: Элсэлтийн шалгалтад 800 оноо авсан багш, сурагчдыг урамшуулав
ОРОН НУТГИЙН МЭДЭЭ | ДОРНОД
Чойбалсан, 2024 оны долдугаар сарын 13 /МОНЦАМЭ/. Элсэлтийн шалгалтад 800 оноо авсан сурагчдыг багш нарынх нь хамтаар аймгийн удирдлага хүлээн авч, шагнаж урамшууллаа.
Энэ хавар Дорнод аймгийн ЕБС-иудын 12-р ангийг 830 сурагч төгсөж, 802 нь элсэлтийн шалгалт өгснөөс зургаан сурагч 800 оноо авчээ.
Тодруулбал, "Долоодой" сургуулийн 12-р ангийн сурагч Б.Золбаяр математик, физик, англи хэлээр 800 оноо авсан бол "Шинэ хөгжил" цогцолбор сургуулийн 12б ангийн сурагч А.Батням, 5-р сургуулийн 12б ангийн сурагч Г.Үүрцайх нар нийгэм судлалын хичээлээр, 8-р сургуулийн 12а ангийн сурагч Б.Эрдэнэцацралт англи хэлээр 800 оноо авсан юм.
Тэдэнд тус бүр 1 сая төгрөгийн урамшуулал, батламж гардуулав. Мөн сурагчдаа элсэлтийн шалгалтад амжилттай бэлдсэн "Долоодой" сургуулийн математикийн багш Ц.Алдармаа, англи хэлний багш О.Отгонзул, физикийн багш Б.Нямжав, "Шинэ хөгжил" цогцолбор сургуулийн нийгэм судлалын багш Н.Ган-Эрдэнэ, 5-р сургуулийн нийгэм судлалын багш У.Гантуяа, 8-р сургуулийн англи хэлний багш Б.Баттуяа нарыг урамшуулсан байна.
