Улаанбаатар
ХОВД: З.Эрхбаяр аймгийн ИТХ-ын дарга боллоо
ОРОН НУТГИЙН МЭДЭЭ | ХОВД
Жаргалант, 2024 оны аравдугаар сарын 25 /МОНЦАМЭ/. Ховд аймгийн ИТХ-ын анхдугаар хуралдаанаар долоон асуудал хэлэлцэж байна.
Үүний нэг бол аймгийн ИТХ-ын даргыг сонгох тухай асуудал юм.
Энэ хүрээнд Монгол ардын намын бүлэг төлөөлөгчийг нэр
дэвшүүлээгүй. Харин Ардчилсан намын бүлэг 17 дугаар тойргоос сонгогдсон
төлөөлөгч Зуноровын Эрхбаярыг ИТХ-ын даргад нэр дэвшүүллээ.
Ингээд төлөөлөгчид нэр дэвшигчээс асуулт асууж,
хариулт авсан ба нууцаар санал хураав.
Төлөөлөгчдийн олонхын саналд үндэслэн З.Эрхбаяр аймгийн ИТХ-ын дарга боллоо.
З.Эрхбаяр нь 1986 онд Ховд аймгийн Дөргөн суманд төрсөн. Мэдээллийн системийн инженер мэргэжилтэй. Сумын ИТХ-д нэг удаа, аймгийн ИТХ-д нэг удаа сонгогдсон юм. Мөн тэрбээр төр, хувийн хэвшлийн байгууллагад 16 жил ажилласан туршлагатай.
Шинээр сонгогдсон аймгийн ИТХ-ын дарга З.Эрхбаярт тамга тэмдгийг нь аймгийн ИТХ-ын дарга асан Г.Пүрэвганди гардуулан өгч, амжилт хүслээ.
Аймгийн ИТХ-ын дарга З.Эрхбаяр цаашид нутгийн өөрөө удирдах байгууллагын чадавхыг бэхжүүлэх, төрийн бодлого, үйл ажиллагааны ил тод, нээлттэй байдлыг бүрдүүлэх, орон нутгийнхаа бүхий л салбарын хөгжлийн дэмжихэд анхаарч ажиллахаа илэрхийлэв.
Хуралдаан түр
хугацаанд завсарлаж байна. Үргэлжлүүлэн
аймгийн ИТХ-ын зөвлөл болон хороог байгуулж, бүрэлдэхүүнийг батлах тухай,
аймгийн Засаг даргад нэр дэвшүүлэх тухай асуудлыг хэлэлцэнэ.
