Улаанбаатар
ДУНДГОВЬ: Марш тактикийн тэмцээнд Зэвсэгт хүчний 278 дугаар байгууламж түрүүллээ
ОРОН НУТГИЙН МЭДЭЭ | ДУНДГОВЬ
Мандалговь, 2025 оны гуравдугаар сарын 19 /МОНЦАМЭ/. ”Монгол цэргийн өдөр", Орчин цагийн зэвсэгт хүчин
үүсэн байгуулагдсаны 104 жилийн ойг тохиолдуулан Төрийн цэргийн болон хууль
сахиулах байгууллагуудын дунд марш тактик, тусгай бэлтгэлийн тэмцээнийг зохион
байгуулж, Аварга тасаг, Аварга бүлэг шалгарууллаа.
Тэмцээнд Зэвсэгт хүчний 278 дугаар байгууламж, Онцгой
байдлын газар, Цагдаагийн газар, Шүүхийн шийдвэр гүйцэтгэх газраас 4 тасаг, 3
бүлэг оролцжээ.
Марш тактик, тусгай бэлтгэлийн аварга тасаг шалгаруулах
тэмцээн ерөнхий цэргийн саад туулах, гранат шидэх, 50 метр саад туулах, галын
бэлтгэлийн норматив боловсруулах, буудлага, хөнөөлийн голомт туулах, ҮОХЗХБ-ийн
нормативыг боловсруулж, дасгал даалгаврыг биелүүлэх гүйлтээр алба хаагчдын ур чадвар, бие бялдрын түвшин,
эр зориг, тэсвэр хатуужил, шандсыг сорив.
Марш тактик аварга тасаг шалгаруулах тэмцээнд Онцгой
байдлын газрын тасаг түрүүлж, Зэвсэгт хүчний 278 дугаар байгуулламжийн хоёр
тасаг удаах байруудад шалгарлаа.
Харин 2025 оны Аварга бүлгээр Зэвсэгт хүчний 278
дугаар байгууламжийн бүлэг түрүүлж, Онцгой байдлын газар болон Шүүхийн шийдвэр
гүйцэтгэх газрын бүлэг удаалжээ.
Багийн нийлбэр дүнгээр дэд хурандаа М.Аскербек захирагчтай Зэвсэгт хүчний 278 дугаар байгуулламж түрүүлж, аймгийн Засаг даргын нэрэмжит 2025 оны марш тактик, тусгай бэлтгэлийн Аварга тасаг, Аварга бүлэг шалгаруулах тэмцээний шилжин явах цомын эзэн болсон юм. Ийнхүү Зэвсэгт хүчний 278 дугаар байгуулламж 3 дахь жилдээ тус тэмцээний аварга болж, шилжин явах цом хадгалж байна.
