Улаанбаатар
iPhone үйлдвэрлэгч компани цахилгаан авто машин үйлдвэрлэнэ
ДЭЛХИЙН МЭДЭЭ | ЭДИЙН ЗАСАГ
ТАЙБЭЙ, 2025 оны тавдугаар сарын 8 /BBC/. Америкийн “Apple” компанийн iPhone гар утсыг үйлдвэрлэгч “Foxconn” компани Японы “Mitsubishi Motors” компанийн цахилгаан авто машинуудыг үйлдвэрлэхээр төлөвлөж байгаагаа зарлажээ.
Зарчмын хувьд
тохиролцсон гэрээний дагуу хамтарсан компани Тайваньд “Mitsubishi”-гийн авто машины загварыг зохион бүтээж, үйлдвэрлэнэ. Компаниуд шинэ загвараа ирэх оны эцэс
гэхэд худалдаанд гаргахаар төлөвлөж
байна.
Энэхүү гэрээ нь “Foxconn”-ы хувьд эрчимтэй хөгжиж буй, өрсөлдөөн ихтэй цахилгаан машины
салбарт байгуулсан анхны томоохон гэрээ болох юм. Харин “Mitsubishi”
зэрэг Японы авто машин үйлдвэрлэгчид Зүүн
Өмнөд Ази, Өмнөд Америк,
Европын зах зээлд Хятадын компаниудтай ширүүн өрсөлдөж байна.
Шинэ
машинуудыг “Foxconn” болон Тайванийн авто машин
үйлдвэрлэгч “Yulon Motor”-ын хамтарсан үйлдвэр болох “Foxtron” үйлдвэрлэх ажээ. “Foxtron” нь загвар дизайн, үйлдвэрлэлийн менежментийн
үйлчилгээ үзүүлэх бөгөөд шинэ
загварын авто машиныг 2026
оны хоёрдугаар хагаст Австрали, Шинэ Зеландын зах зээлд гаргах төлөвтэй байна гэж компаниудын мэдэгдэлд дурджээ.
Одоогоор харилцан ойлголцлын санамж бичиг гэж нэрлэгдэж буй гэрээ нь хоёр компанийн хооронд байгуулсан заавал биелүүлэх албагүй хэлцэл юм. Компаниуд “тодорхой тохиролцоонд хүрэхийн тулд яриа хэлэлцээгээ үргэлжлүүлнэ” гэдгээ мэдэгджээ. “Foxconn” бол дэлхийн хамгийн том электрон хэрэгслийн үйлдвэрлэгч бөгөөд үйлчлүүлэгчдийнх нь дунд “Apple” зэрэг томоохон технологийн компаниуд багтдаг. Харин “Mitsubishi Motors” бол “Nissan” болон Францын авто машин үйлдвэрлэгч “Renault”-ын эвслийн түнш юм.
Хятадын авто машины үйлдвэрлэл сүүлийн жилүүдэд хурдацтай
хөгжиж, дэлхийн хоёр дахь том эдийн засагтай тус улс өргөжин тэлж буй цахилгаан машины зах зээлд тэргүүлэгч
болж байгаа энэ үед дээрх шийдвэрийг гаргажээ.
“BYD” зэрэг Хятадын
томоохон компаниуд шинэ хэрэглэгчидтэй болсоор байгаа тул
дэлхий даяарх нэр хүндтэй
авто машин үйлдвэрлэгчид тэдэнтэй өрсөлдөхийн тулд багагүй хүчин чармайлт гаргаж байна.
