Бионик нүд ашиглан нэгэн эмэгтэйн харааг дахин сэргээжээ

ДЭЛХИЙН МЭДЭЭ | СОНИН ХАЧИН
sarnai@montsame.mn
2016-11-08 10:22:14

ВАШИНГТОН. /Futurism/. Эрдэмтэд хараагүй хүмүүсийн харааг сэргээхийн тулд янз бүрийн аргуудыг хайсаар байгаа билээ.

Хүний харааг сэргээх зориулалттай төхөөрөмжийг зохион бүтээж үйлдвэрлэдэг “Second Sight” компани “Orion I” гэдэг төхөөрөмжийг эхний өвчтөнд амжилттай шилжүүлэн суулгажээ.

“Orion I” бол хараагүй хүмүүсийн харааг дахин сэргээх зориулалттай тархины бор давхаргыг идэвхжүүлэгч утасгүй төхөөрөмж юм. “Second Sight”-ийн дэмжлэгтэйгээр Лос-Анжелесын их сургууль дээр явагдсан туршилтаар олон суваг бүхий мэдрэлийг сэргээгч утасгүй системийг 30 настай өвчтөний харааны гадаргууд суулгасан байна.

Туршилтын явцад өвчтөнд ямар нэгэн зовиур гаж нөлөө илрээгүй бөгөөд бүдэг гэрлийг мэдэрч чадаж байжээ. Энэхүү аппарат нь “Second Sight”-ийн үйлдвэрлэсэн "Argus II” гэдэг төхөөрөмжинд бага  зэрэг өөрчлөлт хийн сайжруулсан хувилбар юм.

“Argus II” нь нүдний торлог бүрхэвчийн ашиглаж болохуйц эсүүдийг сэргээдэг бол “Orion I” нь өвчтөний тархин дахь харааны гадаргууг сэргээдэг байна.

“Second Sight”-ийн Гүйцэтгэх захирал Уилл Макгуир ярихдаа “энэ технологи нь “Argus II” гэдэг торлогийн хиймэл эрхтэн хийлгэх боломжгүй байгаа 6 сая орчим хараагүй хүмүүсийг хараатай болгоно гэж бид найдаж байна” гэлээ.

“Second Sight” компани 2017 оны эхээр АНУ-ын Хүнс ба эмийн бүтээгдэхүүний захиргаанд /FDA/-д хүсэлт гаргах бөгөөд уг төхөөрөмжийг эмнэлзүйн туршилтад оруулах зөвшөөрлийг хүсэх ажээ.

Энэ технологи нь нийтийн хүртээл болоход багагүй хугацаа орж магадгүй учир нь FDA-гаас эрүүл мэндтэй холбоотой төхөөрөмжүүдийг маш хатуу шалгадагтай холбоотой юм.

Хэрэв уг төхөөрөмжийг хэрэглэх зөвшөөрлийг FDA олгох аваас маш олон хараагүй хүмүүсийн амьдрал өөрчлөгдөх нь гарцаагүй. “Orion I" нь нүдний даралт, хорт хавдар, чихрийн шижин болон осол гэмтэл зэргийн улмаас хараагүй болсон өвчтөнүүдийн харааг бага ч болов сэргээж чадна” гэж “Second Sight”-ийн ТУЗ-ийн дарга, доктор Роберт Грийнберг ярьж байна.

Х.Сарнай

 

Холбоотой мэдээ