Улаанбаатар
Завханд түлшний үнэ нэмэгджээ
ОРОН НУТГИЙН МЭДЭЭ
Завханы төв Улиастай сум таван мянга гаруй айл өрхтэй. Түлшний мод, нүүрс хэрэглэхгүй ААН байгууллага гэж нэг ч үгүй. Тийм ч учраас түлшний хувьд томоохон асуудал байсаар байсан.
Харин энэ асуудлаа бүрэн шийдэж хөнгөлөлттэй үнээр түлш зардаг түлшний захыг гурван жилийн өмнө албан ёсоор нээсэн. Гэтэл энд нь ямар ч түлш зардаггүй хоосон хашаа л байсаар гурван жил болжээ.
Хувиараа машин дээрээ түлш зарсан иргэд зам дагуу зогссоор дуртай үнээ хэлэн борлуулдаг байна. Энд хяналт ч байхгүй. Зах зээлийн жамаар л иргэд түлшний үнийг хэлснээр нь л худалдаж авдаг байна. Түлшний ченжүүд өвлийн дунд сар, түлш ховордсон үеэр далимдуулан намар зарж байсан үнээс даруй 30 мянган төгрөгөөр түлшний үнээ нэмжээ. Өнгөрсөн намар ЗИЛ-130 машин мод 500-600 мянга төгрөг, нэг портер мод 300 мянган төгрөгөөр худалдаалагдаж байсан бол одоо нэг портер машин мод 370-400 мянган төгрөгт хүрчээ. Харин нүүрсийг жижиглэнгээр борлуулдаггүй ажээ.
Б.Мягмарсүрэн
Холбоотой мэдээ
