Улаанбаатар
Дэлхийн аварга А.Карпов НҮБ-ын Төв байранд зэрэг тоглолт хийнэ
ДЭЛХИЙН МЭДЭЭ | СПОРТНҮБ./TASS/.Шатрын их мастер Анатолий Карпов 4 дүгээр сарын 6-нд Нью-Йоркт НҮБ-ын Төв байранд 15 хүнтэй зэрэг тоглолт хийнэ. Мягмар гарагт НҮБ-д суугаа ОХУ-ын Байнгын төлөөлөгчийн газрын мэдээлснээр, уг арга хэмжээ нь Энх тайван, хөгжлийн төлөө Олон улсын спортын өдөрт зориулагдаж байгаа ажээ.
Зэрэг тоглолт Ерөнхий Ассамблейн байранд явагдах ба Оросын дипломат байгууллагын мэдээлснээр, А.Карпов НҮБ-ын төлөөлөгчидтэй 15 өрөг зэрэг тоглох аж. Үүгээрээ дэлхий дахинд энх тайван тогтоох, НҮБ-ын тогтвортой хөгжлийн зорилтыг хэрэгжүүлэхэд спорт эерэг нөлөө үзүүлнэ гэдгийг тодотгон харуулах юм. Их мастертай тоглох өрсөлдөгчдийн дотор улс орнуудын элчин сайд нар байна.
Ерөнхий Ассамблейн шийдвэрээр Энх тайван, хөгжлийн төлөөх Олон улсын спортын өдрийг 2013 оны 4 дүгээр сарын 6-ны өдрөөс эхлэн тэмдэглэх болжээ. НҮБ-ын хуанлид энэ тэмдэглэлт өдрийг оруулах тухай тогтоолыг санаачлагчдын нэг нь Орос улс юм.
О.Барс
